Atas ni PBBM sa DOTr at CAAP, makipag-ugnayan sa Malaysia at Singapore para mabawi ang helicopter at eroplano ni Zaldy Co

INIULAT ni Pangulong Ferdinand Marcos Jr., na inatasan niya ang Department of Transportation (DOTr) at Civil Aviation Authority of the Philippines (CAAP) na makipag- ugnayan sa Malaysia at Singapore dahil sa ulat na ang helicopter at eroplano na pag-aari ni dating Ako Bicol party-list Rep. Elizaldy “Zaldy” Co ay doon itinatago.
Sinabi pa rin ng Pangulo sa kanyang video message na nakarehistro ang nasabing helicopter at eroplano sa kompanya ni Zaldy Co na Misibis Aviation and Development Corporation.
“Ngunit nagkaroon na ng freeze order ang AMLC, kaya lahat ng galaw at disposisyon ng mga aircraft na ito ay lalong-lalo na ngayon ay ipinagbabawal dahil kailangan natin ipaalam sa lahat ng mga pugante– hindi puwedeng gamitin ang mga ari-arian na galing sa kaban ng bayan, ninakaw ninyo para tumakas o umiwas sa batas,” sinabi ng Pangulo.
“You cannot steal from the Filipino people and expect to hide or fly away on your private jets. You may have the money to run, but you cannot outrun the Republic of the Philippines,” aniya pa rin.
Kaya nga, ang payo ni Pangulong Marcos sa lahat ng mga pugante na umuwi na ang mga ito sa Pilipinas.
“Ang payo ko sa inyo, hindi na kayo turista. Hinahabol na kayo ng batas,” ang sinabi ng Pangulo.
Samantala, kinumpirma aniya sa kanya ng Department of Justice (DoJ) na si dating Department of Public Works and Highways-Bulacan engineer na si Henry Alcantara ay nagbalik na ng ₱110 milyon sa gobyerno, at sa loob aniya ng dalawang linggo ay magbabalik pa si Alcantara ng ₱200 milyon.
“This government intends to bring back every peso, every asset, every person responsible and return it to the Filipino people,” ang winika ni Pangulong Marcos.
Ang mga pahayag na ito ng Pangulo ay bahagi ng patuloy na pag rereport niya sa taumbayan tungkol sa mga development ng mga kaso hinggil sa kontrobersiyal at maanomalyang flood control project.
( Daris Jose)