Mister nabuhusan ng natutunaw na bakal, patay

TODAS ang isang 45-anyos na mister matapos aksidenteng mabuhusan ng natutunaw na bakal sa kanyang pinagtatrabahuan sa Caloocan city, kamakalawa ng gabi.

Kinilala ang nasawing biktima na si Edgardo Obzunar, 45, scrap charger at residente ng CF Natividad St. Mapulang Lupa, Valenzuela city.

Lumabas sa imbestigasyon ng pulisya, dakong alas-7 ng gabi nang maganap ang insidente sa Furnice 5 Area, 8th MGM Industrial Compound na matatagpuan sa No. 1420 Mindanao Avenue, Brgy. 166, Kaybiga, Caloocan city.

Sa pahayag sa pulisya ng saksing si Carlo Riego, 24, crane operator, nagtatrabaho sila sa naturang lugar nang makarinig siya ng ingay mula sa lugar kung saan nagtatrabaho ang biktima.

Nang tingnan ng saksi, nakita nito ang biktima na nabuhusan ng natutunaw na bakal ang katawan na naging dahilan upang pagtulungan nila, kasama ang kanilang mga katrabaho na buhusan ng tubig si Obzunar.

Gayunman, hindi na naisalba ang biktima at namatay din ito dahil sa mga tinamong sunog sa kanyang katawan kaya’t ipinaalam na lamang ang insidente sa pulisya. (Richard Mesa)