Tiniyak na magiging ligtas at maayos ang buong summit…PNP handang magbigay-seguridad sa 49th ASEAN Summit- Malakanyang

HANDA na ang Philippine National Police (PNP) na magbigay ng seguridad sa 49th ASEAN Summit at mga kaugnay na pagpupulong na gaganapin sa Nobyembre 2026, ayon sa Malakanyang.

Sa Palace press briefing, sinabi ni Presidential Communications Office (PCO) Undersecretary at Palace Press Officer Claire Castro na patuloy ang paghahanda ng pamahalaan upang matiyak ang kaligtasan ng mga lider mula sa iba’t ibang bansa, mga delegado, bisita, at ng publiko.

Ayon kay Castro, tiniyak ng PNP na magiging ligtas at maayos ang buong summit.

“The Philippine National Police is ready to secure the 49th ASEAN Summit this November 2026. We are committed to ensuring the safety of participating heads of state, delegates, guests, and the public and maintaining peace and order throughout the event,” ani Castro.

Patuloy din ang pakikipag-ugnayan ng PNP sa iba’t ibang ahensya ng pamahalaan, lokal na pamahalaan, at iba pang katuwang para sa paghahanda sa seguridad at pagtugon sa anumang posibleng banta.

“The PNP assures the public that we are taking this responsibility seriously. We will remain alert, professional, and ready to help ensure the safe, peaceful, and orderly conduct of the Summit,” ani Castro.

Ginawa ni Castro ang pahayag nang tanungin tungkol sa mga ulat na may ilang grupong posibleng magsagawa ng mga kilos-protesta sa kasagsagan ng summit, lalo na kung dadalo si US President Donald Trump.

Sinabi ni Castro na iginagalang ni Pangulong Ferdinand R. Marcos Jr. ang karapatan ng bawat Pilipino na magpahayag ng kanilang saloobin at hinaing.

“Ang nais ng Pangulo iparating sa ating mga kababayan na ang inyong karapatan na manawagan, magsabi ng inyong hinaing ay karapatan. Hindi po ito ipinagbabawal,” apela ni Castro.

Gayunman, nanawagan ang Palasyo na panatilihing maayos at mapayapa ang mga aktibidad habang tinatanggap ng Pilipinas ang mga dayuhang lider at delegado.

“Mas magandang i-welcome natin ang ating mga bisita at kung kayo naman ay mayroong hinaing, ito naman ay maaari ninyong sabihin sa ibang araw,” dagdag pa ng Palace Press Officer.

Binigyang-diin ni Castro na ang pahayag ng Palasyo ay isang panawagan lamang at hindi utos sa publiko.

Una nang ipinalabas ng Palasyo ang November 16 hanggang 18 bilang special non-working days sa National Capital Region.

Layunin nitong makatulong sa pag-iwas sa matinding pagsisikip ng trapiko at bigyang-daan ang pamahalaan na makapaghanda ng mga kinakailangang hakbang para sa kaligtasan at maayos na pagsasagawa ng ASEAN Summit. 

(DARIS JOSE)