SEC: VP Sara, 4 taon sa board ng private firm habang VP

SA KABILA ng probis­yon ng Konstitusyon na nagbabawal sa isang Bise Presidente na direkta o hindi direktang makilahok sa anumang negosyo habang nasa puwesto, nanatiling nakalista si Vice President Sara Duterte bilang direktor ng isang pribadong korporasyon mula 2022 hanggang 2025, ayon sa mga rekord ng Securities and Exchange Commission (SEC).

Sa pagtestigo sa ika-27 araw ng impeachment trial ni Duterte, kinumpirma ni SEC Company Registration and Monitoring Department Director Atty. Gerardo del Rosario ang mga corporate record na nagpapakitang nakalista si “Sara Z. Duterte” bilang parehong stockholder at miyembro ng board of directors ng Metro City Chow Foods Corporation sa buong panahong siya ay Bise Presidente.

Ipinunto ni private prosecutor Atty. Erwin Matib na hindi awtomatikong nakakakuha ng puwesto sa board ng isang korporasyon ang isang tao dahil ang mga direktor ay inihahalal ng mga shareholder.

“Sino po bang nami­mili ng magiging members ng board of directors?” tanong ni Matib.

“Ang director po ay ini-elect po ng mga shareholders,” sagot ni Del Rosario.

Sinabi ni Matib na patuloy na lumilitaw si Duterte bilang direktor sa mga isinumiteng dokumento ng korporasyon taun-taon.

“So may eleksyon ho? Mukhang taun-taon po may eleksyon at la­ging nananalo si VP Sara sa pagiging director sa kompanyang ito,” sabi ni Matib.

Ipinakita ng mga rekord ng SEC na nakalista si Duterte bilang stockholder at miyembro ng board ng Metro City Chow Foods Corp. mula 2022 hanggang 2025, na may hawak na 500 shares sa kumpanya. Ipinakita rin ng mga naunang corporate record na isa siya sa mga incorporator ng kumpanya nang itatag ito noong 2016 at naging miyembro ng board mula 2018.

Opisyal na nagsimula ang termino ni Duterte bilang Bise Presidente noong Hunyo 30, 2022.

Nauna nang kinumpirma ng SEC na lumitaw ang pangalan ni Duterte sa General Information Sheets ng Metro City Chow Foods Corp. bilang parehong stockholder at miyembro ng board mula 2022 hanggang 2025.

Tinanong naman ni Matib si Del Rosario tungkol sa mga restriksiyong itinakda ng Konstitusyon para sa isang nakaupong Bise Presidente na nananatiling sangkot sa isang pribadong korporasyon.

Binanggit ni Del Rosario ang Article VII, Section 13 ng 1987 Constitution, na nagtatakda ng mas mahigpit na mga restriksiyon para sa Pangulo, Bise Presidente, mga miyembro ng Gabinete, at kanilang mga deputy at assistant habang nasa puwesto.

Kabilang dito ang pagbabawal sa direkta o hindi direktang pakikilahok sa anumang negosyo at ang kinakailangang mahigpit na pag-iwas sa conflict of interest.

Nakasaad sa Republic Act No. 6713, o ang Code of Conduct and Ethical Standards for Public Officials and Employees na ang mga pampublikong opisyal ay dapat iwasan ang conflict of interest.

Kapag nagkaroon ng conflict, inaatasan ng batas ang isang opisyal na magbitiw sa posis­yon sa isang pribadong business enterprise sa loob ng 30 araw mula sa pag-upo sa puwesto at/o i-divest ang mga shareholding o interes sa loob ng 60 araw.

( DARIS JOSE)