MONTHLY FINANCIAL SUPPORT PARA SA MGA OPERATOR NG MODERN JEEPNEY MAGSISIMULA NGAYONG LINGGO

NAGLABAS ang Land Transportation Franchising and Regulatory Board (LTFRB) ng mga panuntunan para sa pagbibigay ng tulong sa mga Transport Service Entities (TSEs) na nahihirapang bayaran ang buwanang amortization ng kanilang mga modern jeep.

Ayon kay Acting LTFRB Chairman Atty. Greg G. Pua Jr., magsisimula ngayong linggo ang programa ng ayuda. Layunin ng mga panuntunan na maging malinaw, mabilis at maayos ang proseso upang agad na makarating ang tulong sa mga kwalipikadong benepisyaryo.

Layunin ng PTMP na higit pang pagandahin at gawing moderno ang sistema ng pampublikong transportasyon sa bansa upang makasabay sa pamantayan ng mga maunlad na bansa, kabilang ang pagbibigay ng mas maayos na serbisyo at mas makakalikasang operasyon.

Marami sa mga nasa sektor ng transportasyon ang sumuporta sa programa at nakakuha ng mga modern jeep sa pamamagitan ng loan program na may subsidiya mula sa pambansang pamahalaan.

“Patunay ang programang ito na ang administrasyong PBBM ay maagap at sensitibo sa mga suliraning kinakaharap ng sektor ng pampublikong transportasyon. Kami sa LTFRB ay nakatuon sa maayos na pagpapatupad nito,” ani Acting Chairman Pua.

“Batid namin ang pangangailangang magbigay ng tulong pinansyal sa mga kwalipikadong TSEs dahil sa patuloy na pagtaas ng presyo ng gasolina at iba pang gastusing operasyonal na nakaaapekto sa pagpapatuloy ng kanilang serbisyo,” dagdag niya.

Layunin ng programa na maiwasan ang foreclosure at loan default sa pamamagitan ng direktang suportang pinansyal para sa buwanang obligasyon sa utang, at matiyak ang tuloy-tuloy na serbisyo para sa mga commuter.

Saklaw ng programa ang mga modernong jeepney at UV Express sa buong bansa, gayundin ang mga modernong bus sa Metro Manila. Maaaring gamitin ang ayuda para sa hanggang tatlong buwan ng amortization o gastusing operasyonal.

Makakatanggap ng ₱20,000 bawat unit kada buwan ang mga kwalipikadong operator na may atraso, natitirang loan obligation, o nasa panganib na hindi makabayad. Maaari itong gamitin sa mga gastusin tulad ng gasolina, maintenance at spare parts, upa sa garahe at terminal, at utilities.

Kabilang sa mga kwalipikasyon ang pagkakaroon ng Certificate of Public Convenience (CPC), kawalan ng nakabinbing legal na kaso, at walang rekord ng malubhang paglabag sa road safety. (PAUL JOHN REYES)