Magsayo, natalo sa unanimous decision kay Andres Cortes; dating WBC Featherweight champion bumagsak sa 29-3 record

NAPUTOL ang winning streak ni former WBC Featherweight Champion Mark “Magnifico” Magsayo matapos siyang talunin ni Andres Cortes via unanimous decision nitong Sabado ng gabi sa T-Mobile Arena.

Iginawad ng tatlong judges ang parehong 97-93 score kay Cortes matapos kontrolin ng Mexican-American boxer ang malaking bahagi ng kanilang 10-round lightweight na laban.

Nahadlangan ni Cortes ang explosiveness at mabilis na kombinasyon ni Magsayo sa pamamagitan ng agresibong pakikipaglaban sa close range. Sa halip na bigyan ng distansya ang dating world champion, patuloy niyang pinasikip ang laban at epektibong ginamit ang kanyang right hand mula sa iba’t ibang anggulo.

Bahagyang nakabawi si Magsayo sa huling tatlong rounds matapos magkaroon ng hiwa si Cortes, ngunit hindi na ito naging sapat upang mabago ang resulta.

Dahil sa pagkatalo, bumaba ang standings ni Magsayo sa 29-3, 19 KOs, habang nanatiling walang talo si Cortes sa 26-0, 13 KOs.

Ang laban ay bahagi ng Zuffa Boxing event at mahalagang pagkakataon sana para kay Magsayo na palakasin ang kanyang posisyon sa lightweight division at muling mapalapit sa world title contention.