PBBM, tiniyak ang sapat na suplay ng pagkain sa gitna ng krisis sa Middle East; long-term rice imports isinusulong

TINIYAK ni Pangulong Ferdinand R. Marcos Jr. sa mga Pilipino na sapat ang suplay ng pagkain sa bansa habang nagsasagawa ang administrasyon ng mga hakbang upang mabawasan ang epekto ng patuloy na kaguluhan sa Middle East, partikular ang pagtaas ng presyo ng langis at iba pang pangunahing bilihin.

Sa isang Kapihan matapos ang kanyang paglahok sa 18th BRICS Summit sa New Delhi, India, sinabi ni Pangulong Marcos na nakatuon ang pamahalaan para magkaroon ng sapat na suplay ng pagkain at pagpapanatiling abot-kaya ang mga presyo, habang patuloy na naaapektuhan ng tensiyong geopolitical ang energy markets at global supply chains.

“There are certain things that you cannot control, you have no influence over, such as the war in Iran and the volatility of the prices of oil. You can, however, do something about food,” ani Pangulong Marcos.

“So, ’yun ang tinitiyak namin. That’s why in the past few days, marami kayong naririnig, sapat ang food supply dito sa atin sa Pilipinas,” dagdag ng Pangulo.

Sinabi ni Pangulong Marcos na bahagi ng estratehiya ng administrasyon ang pagtiyak sa sapat na suplay ng pagkain upang hindi maapektuhan ng sigalot sa Middle East ang pang-araw-araw na pamumuhay ng mga Pilipino.

Binigyang-diin ng Pangulo na partikular na tinututukan ng pamahalaan ang pagpapababa ng presyo ng pagkain habang patuloy na nagbibigay ng ayuda sa mga mahihirap na pamilya.

Bilang bahagi ng mga hakbang na ito, ibinahagi ni Pangulong Marcos na isinusulong ng Pilipinas ang posibleng pangmatagalang kasunduan sa suplay ng bigas sa Vietnam.

Sinabi ng Pangulo na tinalakay ang usapin sa kanyang 20-minutong bilateral meeting sa Vietnamese leader sa sidelines ng BRICS Summit kung saan kabilang sa mga napag-usapan ang rice imports, presyo ng bigas at posibilidad ng isang long-term contract.

“We talked about rice and rice importation and talking about a long-term contract. We talked about pricing. Hindi pa tapos. We’ve been talking about this for a long time,” ani Pangulong Marcos.

Binigyang-diin ng Pangulo na layunin ng mga pag-uusap na matiyak ang matatag na suplay ng bigas at mapababa ang presyo ng pagkain para sa mga Pilipinong mamimili.

“I am so concerned that the food prices have to come down, and we’re trying to do everything. At patuloy naman yung pagtulong natin sa mga hindi, yung walang may kaya para at least meron silang kinakain,” pahayag pa ni Pangulong Marcos.

Kabilang sa mga prayoridad na sinabi ng pamahalaang isusulong ng Pangulo sa BRICS Summit ang food at energy security, kasunod ng mga talakayan hinggil sa mga geopolitical conflict at epekto nito sa pandaigdigang kalakalan at supply chains.

Pinuri rin ni Pangulong Marcos ang mga local government unit sa pagtulong sa national government sa paghahatid ng ayuda sa mga komunidad, partikular sa panahon ng mga emergency at kahirapang pang-ekonomiya.

“And everybody is pitching in talaga. It’s always become very much a whole government approach,” ayon pa sa Pangulo.

Sinabi ng Pangulo na ang mas mahigpit na koordinasyon sa pagitan ng national at local government ay nakatulong upang mapalakas ang kapasidad ng pamahalaan na maabot ang mga vulnerable na Pilipino at maipagpatuloy ang pagbibigay ng tulong habang nagpapatuloy ang mga panlabas na hamon sa ekonomiya. (DARIS JOSE)