Birthday wish ni PBBM: Mas maraming oras para sa pamilya at pang matagalang reporma para sa bansa

MAGKAROON ng mas maraming oras kasama ang kanyang mga anak at si First Lady Louise Araneta-Marcos ang birthday wish ni Pangulong Ferdinand Marcos Jr., na nagdiwang ng kanyang ika-69 taong gulang, araw ng Linggo, Setyembre 13, 2026.

Sinabi ng Pangulo na madalas na hindi kasi nagtutugma ngayon ang kanilang mga iskedyul.

Bukod dito, ang isa pang birthday wish ng Pangulo ay ang pangmatagalang reporma para sa bansa.

Sa katunayan, nais niyang mailatag ang pundasyon para sa mga reporma sa pamahalaan na magpapatuloy kahit matapos na ang kanyang termino.

Sa pakikipag-usap sa mga mamamahayag sa New Delhi, India, sinabi ni Pangulong Marcos na nais niyang maitatag ang mga pundasyon ng mga programa at reporma ng kanyang administrasyon upang maipagpatuloy ang mga ito sa mga susunod na administrasyon.

“I wish I’ll be able to get the beginnings of what we started in place, so that they continue. It is, in many ways, it is a restructuring and I just want to get the basics of that in place so that it will continue, that we will continue to construct the government. We will continue to make it better,” ayon kay Pangulong Marcos.

Inilarawan ng Pangulo ang hakbang bilang isang pagbabago sa sistema ng pamahalaan, na layuning mapabuti ang mga institusyon at matiyak na magpapatuloy ang mga pagbabagong sinimulan ng kanyang administrasyon.

Sinabi rin ni Pangulong Marcos na nais niyang patuloy na makipag-ugnayan ang Pilipinas sa ibang mga bansa, habang hinihikayat ang kalakalan at diplomasya.

Sa harap naman ng mga hamon sa rehiyon at sa buong mundo, sinabi ng Pangulo na mananatili ang Pilipinas sa panig ng kapayapaan.

“We’ll continue down the road of engagement with other countries. We will encourage trade. We will encourage diplomacy. We will always be on the side of peace,” dagdag ng Pangulo. (DARIS JOSE)