Inaasahang lilikha ng humigit-kumulang 2,000 trabaho…PBBM, nakakuha ng investment expansion commitments mula sa Indian companies 

NAKAKUHA si Pangulong Ferdinand R. Marcos Jr. ng mga commitment mula sa mga kumpanyang India na palawakin ang kanilang operasyon sa Pilipinas matapos ang serye ng mga pulong kasama ang mga business group sa Taj Mahal Hotel sa New Delhi, India, nitong Sabado.

Target ng mga kumpanya na palawakin ang kanilang operasyon sa agrikultura, healthcare, digital payments, aviation, artificial intelligence (AI), telecommunications, at iba pang industriyang nakabatay sa teknolohiya.

Ipinaliwanag ni Trade and Industry Secretary Maria Cristina Roque na nagpahayag ng kumpiyansa ang mga kumpanya sa economic policy ng Marcos administration.

“Today, we were able to meet important companies that are already in the Philippines and have expressed expansion plans. They are very positive about the economic policies of the President,” ayon kay Roque.

Kabilang sa mga kumpanyang nakipagpulong kay Pangulong Marcos ang iSON Group, isang conglomerate na nakabase sa New Delhi na may mga negosyo sa agrotechnology, healthcare, telecommunications, information technology, renewable energy, business process outsourcing (BPO), at insurance.

“They want to improve technology in the agriculture sector. Agriculture and food security are among the main priorities of the President, so any advancement in agricultural technology is important to the country and definitely to the President,” dagdag pa ng Kalihim.

Nangako ang iSON Group ng US$75 milyon na bagong investment at pagpapalawak ng kasalukuyang investments nito sa Pilipinas, na inaasahang lilikha ng humigit-kumulang 2,000 trabaho.

Kabilang dito ang iminungkahing US$50-milyong agro-solar project, healthcare at 24/7 teleconsultation services, at US$10-milyong pagpapalawak ng BPO at global delivery centers.

“We are a country of 7,600 islands, so sometimes it is difficult to consult a doctor, especially when the nearest facility is in another town. Through teleconsultation, Filipinos can consult doctors online,” pahayag pa ni Roque.

May higit 25,000 empleyado ang iSON Group at mayroon itong operasyon sa humigit-kumulang 35 bansa. Ang digital infrastructure arm nitong iSON Tower Ltd. Inc. ay nagpapatakbo sa Pilipinas mula pa noong 2021 sa ilalim ng Common Tower Policy ng Department of Information and Communications Technology.

Nakapaglaan na ang kumpanya ng humigit-kumulang US$65 milyon para magtayo ng 450 telecommunications towers, na nagsisilbi sa tinatayang 600 tenants sa Luzon, Visayas, at Mindanao.

Nakipagpulong din si Pangulong Marcos sa NPCI International Limited upang isulong ang kooperasyon sa digital payments, kabilang ang pakikipagtulungan sa LandBank para pag-aralan ang paggamit sa Pilipinas ng payment system na nakabatay sa Unified Payments Interface (UPI) ng India.

Ayon kay Roque, maaaring makinabang dito ang mga overseas Filipino workers (OFWs), negosyo, at publiko, lalo na ang maliliit at katamtamang laki ng mga negosyo.

“If this pushes through, it will be very good. It will not only be used by our OFWs and businesses but by everyone in the country, especially small and medium enterprises,” pahayag pa ni Roque. ( DARIS JOSE)