BASURERO, PUWEDENG MAGING MAYOR AYON KAY YORME ISKO

IPINAGMALAKI ni Manila City Mayor Francisco “Isko” Moreno Domagoso sa mga opisyal ng Parole and Probation Administration (PPA) na ang isang “basurero” ay puwedeng maging Mayor, isang patunay na may saysay ang pagbibigay ng pangalawang pagkakataon sa isang tao.

Sa kanyang talumpati sa The Manila Hotel sa ginanap na 1st PPA-NCR Criminal Justice Stakeholders’ Conference, bilang pagdiriwang ng ika-50 anibersaryo ng PPA, ibinahagi ni Domagoso ang kanyang karanasan sa paglaki sa Tondo, kung saan aniya ay marami siyang nakasalamuhang mga taong nagkaroon ng magkakaibang landas sa buhay.

“Ako ay napapalibutan ng mga medyo maabilidad na indibidwal na hilig tumambay sa kanto. Pare-pareho kami ng environment, umiba lang ako ng landas,” ani Domagoso.

Ikinuwento rin ng alkalde na naging basurero at artista siya bago naging mayor ng Maynila.

“Ang parole ay nagbibigay ng pangalawang pagkakataon. Na ang isang basurero ay puwedeng maging mayor,” dagdag niya, na iniuugnay ang kanyang naging paglalakbay sa layunin ng mga parole officer na tulungan ang mga taong nais magbagong-buhay.

Binigyang-diin ni Domagoso na ang tunay na hustisya ay hindi lamang tungkol sa pagpaparusa kundi pati na rin sa pagbibigay ng pagkakataon sa isang tao na magbago.

“Kapag pinag-uusapan ang hustisya, madalas ang unang naiisip ay parusa. Pero ang tunay na hustisya ay hindi lamang tungkol sa pagpaparusa, ito ay tungkol din sa pagbibigay ng pagkakataong magbago ang isang tao,” aniya.

Nagbiro pa ang Alkalde na may isang kasalukuyang senador sa bansa na aniya’y patunay na epektibo ang sistema ng parole, bagama’t hindi niya ito pinangalanan.

Ibinahagi rin niya ang isang kamakailang insidente ng krimen sa Maynila kung saan, ayon sa kanya, ang kanyang malalim na kaalaman sa mga komunidad ay nakatulong upang mabilis na madakip ang pangunahing suspek, habang tatlo pang iba ang kusang sumuko. Aniya, ang ganitong pag-unawa sa komunidad ang nagbibigay-daan upang epektibong masugpo ang krimen habang nananatiling bukas ang pamahalaan sa rehabilitasyon ng mga nagkasala.

 (Gene Adsuara)