Dagdag benepisyo para sa mga seniors, isinailalim sa rebyu ng House Committee on Senior Citizens

ISINAILALIM sa rebyu ng House Committee on Senior Citizens ang ilang panukalang magpapalakas sa benepisyo, proteksyon at social support system para sa mga senior citizens sa pamamagitan nang pagpapalawig ng mga ito tulad ng healthcare assistance at mas malakas na legal safeguards.

“The laws we craft today will help shape a future where senior citizens are not marginalized or forgotten. We must give birth to a future generation where our Filipino ‘lolos and lolas’ are respected, protected, and empowered,” pahayag ni Committee chairperson at United Senior Citizens Partylist Rep. Milagros Aquino-Magsaysay sa isang pagpupulong.

Iginiit nito na layon ng mga panukala na mapanatili ang dignidad, proteksyon at human rights ng mga matatanda habang sinisiguro na matutugunan at mparusahan ang pang-aabuso at pagpapabaya sa mga ito sa ilalim ng batas.

Isinusulong din sa mga panukala ang pagkakaroon ng karagdagang pasilidad at serbisyo para sa mga senior citizens, partikular na yaong bulnerable, inabandona, walang tahanan o nangangailangan ng specialized care. 

Kabilang sa mga panukalang tinalakay ay ang House Bills 1976, 8486, 8596, 2321, 8897, 39, 148, 281, 1229, 2607, 5187, 6549, 7013, at 7310.

Sinabi ni Taguig-Pateros Rep. Ricardo Cruz Jr., author ng HBs 1976 at 8486, na kailangang palakasin ang pagbibigay ng care system dahil marami sa mga senior citizens ang patuloy na nagdurusa mula sa pagpapabaya, pag-abandona at kakulangan ng access sa healthcare at social support services. 

Isinusulong pa sa panukala ang pagkakaroon ng mga elderly centers at public nursing homes sa bawat siyudad at munisipalidad.

“Ang dalawang panukalang batas na ito ay magkaugnay. One focuses on active and healthy aging through community-based centers for the elderly, while the other provides protection and shelter for those who are abandoned, homeless, and in need of long-term care,” paliwanag nito.

Ang iba pang panukalang tinalakay ay ang hakbang na magpapalawig pa sa mga pribelehiyo at benepisyo at karagdagang financial na tulong tulad ng pagtaas sa discounts at utility-related benefits.

Sa HB 5187 na inihain ni Senior Citizens Partylist Rep. Rodolfo Ordanes na ang mga senior citizens na nasa idad 60 hanggang 69 taon gulang ay patuloy na mabibigyan ng 20% discount habang ang mga idad 70 hanggang 79 ay mabibigyan ng 25% discount. Para naman sa senior citizens na idad 80-taon ay makakakuha ng 30% discount, habang ang mga 90 anyos pataas at mabibigyan ng 35% discount. 

(Vina de Guzman)