Gobyerno, nangako ng legal na pagpapatupad ng arrest warrant laban kay Sen.Bato dela Rosa 

NANGAKO ang Malakanyang ng legal na pagpapatupad at aakto alinsunod sa umiiral na batas sa pagsisilbi ng warrant of arrest laban kay Senador Ronald Dela Rosa.

Sinabi ito ni Presidential Communications Office (PCO) Undersecretary at Palace Press Officer Claire Castro na Palace Press Officer Claire Castro matapos na ianunsyo ni Justice Secretary Fredderick Vida na inatasan na nito ang Philippine National Police (PNP) at National Bureau of Investigation (NBI) na arestuhin si Dela Rosa.

“Maliwanag ang sinabi ng DOJ na enforceable ang warrant of arrest laban kay Sen. Bato,” ang winika ni Castro.

“Karampatang aksyon ng naaayon sa batas ang maaasahan mula sa gobyerno. Lahat ay gagawin ng ating mga opisyal para maibigay ang hustisya sa lahat,” dagdag na pahayag ni Castro.

Nauna rito, ibinasura ng Korte Suprema ang kahilingan ni Senador Ronald “Bato” dela Rosa na maglabas ng temporary restraining order (TRO) at/o status quo ante order (SQAO) laban sa arrest warrant na inisyu ng International Criminal Court (ICC) laban sa kanya.

Sa isang press briefer na inilabas nitong Miyerkules, Mayo 20, 2026, inihayag ng SC ang resulta ng En Banc decision sa botong 9-5-1, na nagbabasura sa naturang kahilingan ni Dela Rosa para sa interim relief.

Sa kanyang mga pahayag sa SC, hiniling ni Dela Rosa ang TRO at/o SQAO upang pigilan ang mga ahensya ng gobyerno na arestuhin siya batay sa anumang warrant na inilabas ng ICC, ano mang Interpol red notice o diffusion, o ano mang banyagang hudisyal o quasi-judicial na instrumento nang walang katumbas na Philippine judicial warrant.

Kabilang sa mga ahensyang binanggit sa petisyon ang Department of the Interior and Local Government, Department of Justice, Department of Foreign Affairs, Philippine National Police, National Bureau of Investigation, Bureau of Immigration, Armed Forces of the Philippines, at Criminal Investigation and Detection Group.

Nilinaw ng SC na ang inaksyunan lamang nila ay ang kahilingan para sa interim relief, partikular ang TRO at SQAO, at hindi pa nila pinagpasyahan ang pangunahing mga isyung legal na inihain ng mga partido sa kaso.

Inanunsyo rin ng SC na naka-upload sa SC website sa Mayo 25, 2026 ang buong resolusyon, kabilang ang magkakahiwalay na concurring at dissenting opinions ng mga mahistrado.

Nananatiling hindi pa nareresolba ang mga pangunahing petisyon na inihain nina Duterte at Dela Rosa.

Nitong nakaraang linggo, tinangka ng mga ahente ng National Bureau of Investigation (NBI) na arestuhin si Dela Rosa sa Senado sa bisa ng arrest warrant na inilabas ng ICC.

Ang arrest warrant ay may kaugnayan sa partisipasyon umano ni Dela Rosa sa madugong war on drugs na ipinatulad ng dating administrasyong Duterte na marami ang namatay. (DARIS JOSE)