₱38.6-M HALAGA NG SHABU NAHARANG SA PARCEL HUBS SA PASAY CITY

INIULAT ng Philippine National Police (PNP) ang matagumpay na pagsabat sa mga ilegal na droga na nagkakahalaga ng mahigit ₱38.6-M sa isang drug interdiction operation noong Marso 31, 2026, sa Central Mail Exchange Center at isang courier facility sa Pasay City.

Nahuli ng mga operatiba ng NAIA Inter-Agency Drug Interdiction Task Group (NAIA-IADITG) ang tatlong papasok na parsela na kalaunan ay natagpuang inabandona. Nang inspeksyunin, ang mga pakete ay naglalaman ng humigit-kumulang 5,691 gramo ng pinaghihinalaang shabu, na tinatayang aabot sa halagang ₱38,698,800.00.

Ipinapakita ng mga rekord na ang mga parsela ay naka-address sa iba’t ibang consignee, kabilang ang mga Pilipino at mga dayuhang may kaugnayan sa ibang bansa, habang ang mga kargamento ay nagmula sa Canada, Pakistan, at Zambia.

Ang mga nakumpiskang droga ay agad na dinala sa Philippine Drug Enforcement Agency (PDEA) National Headquarters para sa wastong paghawak at disposisyon, habang patuloy ang mga imbestigasyon laban sa mga natukoy na consignee at shipper dahil sa paglabag sa Republic Act No. 9165 o ang Comprehensive Dangerous Drugs Act of 2002.

Pinuri ni Chief PNP, Police General Jose Melencio C. Nartatez Jr., ang mga operating unit para sa kanilang pagbabantay at binigyang-diin ang patuloy na banta ng mga sindikato ng droga na nagsasamantala sa mga logistics channel.

“Hindi tayo papayag na gamitin ang ating mga courier at mail systems para makalusot ang ilegal na droga. Mas magiging mahigpit ang ating pagbabantay. Our message is clear, there is no safe entry point for illegal drugs in this country,” sabi ni PGEN Nartatez.

“Papanatilihin namin ang agresibong mga pagsisikap sa pagbabawal at palalakasin ang koordinasyon sa aming mga kasosyong ahensya upang pigilan ang mga pakanang ito bago pa man ito makarating sa aming mga komunidad.” dagdag pa ni PGEN Nartatez.

Ang tagumpay na ito ay bahagi ng pinaigting na kampanya sa ilalim ng iPNP Focused Agenda on Enhanced Managing Police Operations, na naaayon sa direktiba ni Pangulong Ferdinand R. Marcos Jr. upang higit pang palakasin ang laban kontra iligal na droga at protektahan ang sambayanang Pilipino mula sa mga transnational criminal activities. (PAUL JOHN REYES)