Tulong pinansiyal sa buong bansa… ₱651-M NA FUEL SUBSIDY DISTRIBUTION MAAYOS NANG NAIPAMAHAGI

MAAYOS na naipapatupad ang pamamahagi ng fuel subsidy para sa sektor ng pampublikong transportasyon, ayon sa Land Transportation Franchising and Regulatory Board (LTFRB), matapos nitong ipahayag na mahigit ₱651 milyon na ang naipamahaging tulong-pinansyal sa mga benepisyaryo sa buong bansa.

Ayon kay LTFRB Chairperson Atty. Vigor D. Mendoza II, inatasan na niya ang lahat ng Regional Directors na ipagpatuloy ang validation process katuwang ang mga kaukulang ahensya ng pamahalaan upang matiyak ang mabilis, maayos, at walang abala na pamamahagi ng tulong.

“May ilang maliit na hamon tayong naranasan lalo na sa Metro Manila, ngunit nagsilbi itong aral upang maiwasan ang kaparehong sitwasyon sa mga probinsya sa mga nakalipas at darating na araw,” ani Chairperson Mendoza.

“Nanatili ang ating layunin—ang mabilis na pamamahagi ng fuel subsidy. Tinitiyak namin sa ating mga kaibigan at katuwang sa PUV sector na nasa tamang direksyon tayo,” dagdag pa niya.

Ito ay alinsunod sa direktiba ni Pangulong Ferdinand “Bongbong” R. Marcos, Jr. na agad ipalabas ang fuel subsidy sa gitna ng tumitinding tensyon sa Gitnang Silangan.

Nauna nang sinabi ni DOTr Secretary Giovanni “Banoy” Z. Lopez na may nakalaang ₱2.4 bilyon para sa fuel subsidy at inatasan ang LTFRB na maghanda bago pa man maramdaman ang epekto ng tensyon sa bansa.

Mula Marso 17 hanggang kasalukuyan, umabot na sa ₱651,185,000.00 ang naipamahagi. Pinakamalaking bahagi nito ay sa Metro Manila (₱181.278 milyon), CALABARZON (₱98.215 milyon), at Central Luzon (₱73.416 milyon).

Saklaw ng pamamahagi ang mga drayber at operator ng modern at tradisyunal na jeepney, UV Express at Shuttle Transport, mga pampasaherong bus at P2P buses, TNVS partners, Filcabs, taxi, tricycle, at delivery services.

“Hindi pa tapos ang ating tungkulin. Marami pang dapat gawin, ngunit tiniyak namin sa ating mga kababayan na nagtutulungan ang buong pamahalaan hindi lamang upang maipamahagi agad ang fuel subsidy, kundi upang makahanap pa ng iba pang paraan para matulungan ang PUV sector,” ani Chairperson Mendoza.

Nauna ring nanawagan ang LTFRB sa mga may-ari at operator ng PUV terminals na bawasan ng hindi bababa sa 50 porsyento ang renta, habang binawasan din ang toll fees para sa mga PUV. (PAUL JOHN REYES)