DOE: Fuel supply ng Pinas, tatagal pa ng 45-araw

TINIYAK ni Energy Secretary Sharon Garin na may sapat pang fuel supply ang bansa sa loob ng 45-araw base sa kanilang pakikipag-usap sa mga kumpanya ng langis.

Ayon kay Garin, ang kasalukuyang domestic supply ng gasolina ay inaasahang magtatagal pa ng hanggang 53.14 araw habang ang diesel ay hanggang 45.82 araw.

Ang kerosina naman ay hanggang 97.93 araw; jet fuel 38.62 araw; fuel oil 61.49 araw; at liquified petroleum (LPG) gas 23.51 araw.

Siniguro naman ni Garin na patuloy na dumara­ting ang suplay ng langis dahil nakipag-usap na rin aniya ang pamahalaan maging sa mga gobyerno mula sa supplier-countries gaya ng South Korea, Japan, at China.

Ang Philippine National Oil Company (PNOC) aniya ay nakakontrata na ng nasa hanggang 400 bariles ng langis habang ang pamahalaan ay oorder pa ng hanggang 600 bariles ngayong linggong ito, na nagkakahalaga ng nasa hanggang P10 bilyon, mula sa iba’t ibang sources, bilang buffer para sa hanggang isang linggong pangangailangan.
Kaugnay nito, muli ring umapela si Garin sa publiko na huwag mag-hoarding at iwasan ang profiteering na tiyak aniyang makakaapekto sa suplay ng langis ng buong bansa.