Petrolyo, idekralang prime commodity, lagyan ng price ceilings

INIHAIN ng Makabayan bloc ang House Bill No. 8765 upang amyendahan ang Price Act at isama ang gasolina at diesel bilang prime commodities.
Ayon kina ACT Teachers Rep. Antonio Tinio, Gabriela Women’s Party Rep. Sarah Jane Elago at Kabataan Rep. Atty. Renee Louise Co, patuloy sa pagtaas ang presyo ng gasolina dala na rin sa tensyon sa Middle East.
“Habang nagdurusa ang mamamayan, kumakamal ng supertubo ang malalaking kumpanya ng langis at ang mga nagkukunwaring “mitigation” measures ng gobyerno sa pamamagitan ng token subsidies at panakip-butas na hakbang,” saad sa statement ng mga mambabatas.

Palalakasin ng HB 8765 ang kapangyarihan ng gobyerno na magpatupad ng price ceilings sa gasolina at diesel tuwing may kalamidad, emergencies, at malawakang illegal price manipulation o artificial price increases.

“Kagyat na kailangan ang ganitong proteksyon para mapigil ang garapalang overpricing at mapahupa ang domino effect ng fuel hikes sa pamasahe, pagkain, at iba pang pangunahing bilihin,” pahayag pa ng mga ito.

Sinabi pa ng mga mambabatas na ang panukala ay isa lamang urgent relief at accountability tool, at hindi isang kumpletong solusyon sa structural damage na dulot ng Downstream Oil Industry Deregulation Act.

Dapat kumilos agad ang Kamara para sa pagkakaroon nang mas malalim na reporma kabilang na ang mas malakas na regulation sa oil industry, centralized oil procurement, Petron renationalization, at mandatory unbundling ng oil prices.

Hindi anila sapat ang band-aid solution kung deregulasyon ang ugat kundi dapat wakasan ang sistemang nagpapayaman sa iilan at nagpapahirap sa nakararami.
(Vina de Guzman)