Sec. Roque, ipagbibigay-alam sa DBM ang paubos na passport revolving fund

IPAGBIBIGAY-ALAM ni Presidential spokesperson Harry Roque kay Budget Secretary Wendel Avisado ang ibinunyag ni Foreign Affairs Secretary Teodoro Locsin Jr. na ang passport revolving fund ng bansa ay paubos na.

“I will bring this matter up also to [Budget] Secretary [Wendel] Avisado,” ayon kay Sec. Roque.

Gayunpaman, tiwala naman si Sec. Roque kay Locsin na makahahanap ito ng pondo.

Sa Twitter post kasi ni Locsin, Miyerkules ng gabi ay sinabi nito na gagawin niya ang lahat ng kanyang makakaya para makahanap ng pera para i- replenish o punan o dagdagan ang pondo lalo pa’t ang Department of Foreign Affairs (DFA) ay mayroong utang na P388 million sa passport printing contractor APO Production Unit, Inc, isang state-run firm.

Napag-alaman ng Kalihm na ang pondo ay ‘kinain” ng travel allowances, insurance at miscellany.”

Ang passport revolving fund ay mula sa bayad na kinolekta para sa processing at issuance ng passports “requiring special consideration, waiver, or issuance beyond regular office hours.”

Samantala, ayon naman sa Philippine Passport Act of 1996 (Republic Act 8239), ang pondo ay maaaring gamitin ng DFA para sa pagsasaayos ng “passporting at consular services” maliban na lamang para sa pagbabayad ng travel at transportation allowances.