2 PASAHERO NA BIKTIMA NG HUMAN TRAFFICKING, INILIGTAS NG BI

INILIGTAS ng Bureau of Immigration (BI) ang dalawang lalaking pasahero sa Ninoy Aquino International Airport (NAIA) Terminal 3 na ni-recruit para magtrabaho nang illegal sa Russia.
Ang dalawang pasahero, kapwa lalaki at may edad na 48 at 52, ay naharang habang patungong Hong Kong sakay ng isang flight ng Cathay Pacific.
Una nilang iginiit na sila ay maglalakbay bilang mga turista, subalit hinarang matapos mapansin ang maraming hindi pagkakatugma sa kanilang mga pahayag.
Nakakuha ang BI ng impormasyon mula sa Inter-Agency Council Against Trafficking (IACAT) hinggil sa isang malaking grupo ng mga indibidwal na umano’y nagre-recruit para sa trabaho sa Russia. Sa isinagawang secondary inspection, inamin ng mga pasahero na sila ay na-recruit upang magtrabaho sa Russia at na sa Hong Kong pa nila hihintayin ang kanilang mga tiket at visa.
Ibinahagi nila na sila ay na-recruit sa social media na nagsabing legal ang kanilang mga dokumento at nangakong magbibigay ng buwanang sahod na mula 100,000 hanggang 150,000 piso.
Nagbabala si BI Commissioner Joel Anthony Viado sa publiko laban sa ganitong mga modus, at iginiit na ang panlilinlang sa anumang yugto ng biyahe ay malinaw na palatandaan ng human trafficking.
“Hindi kailanman legal ang isang biyahe kung kayo ay inuutusang magpanggap na turista, itago ang tunay na destinasyon, o maghintay ng mga dokumento habang nasa ibang bansa na,” ani Viado.
“Ito ay malinaw na mga red flag ng trafficking at pagsasamantala,” dagdag pa niya.
Muling iginiit ng BI na ang lehitimong pagkuha ng trabaho sa ibang bansa ay nangangailangan ng tamang mga dokumento at malinaw na proseso sa pamamagitan ng mga awtorisadong ahensya ng pamahalaan, at patuloy itong nakikipagtulungan sa IACAT at iba pang ahensya ng batas upang mailigtas ang mga posibleng biktima at maiwasan ang human trafficking.
Ang dalawang nailigtas na pasahero ay isinangguni sa IACAT para sa tulong at para sa pagsasampa ng mga kaso laban sa kanilang mga recruiter. (Gene Adsuara)