Yorme Isko Moreno, nangakong paigtingin ang disiplina sa pananalapi sa City Hall

IPINAHAYAG ni Manila City Mayor Francisco “Isko” Moreno Domagoso ang kanyang pagiging optimistiko para sa mas masaganang taong 2026 sa kanyang mensahe sa Bagong Taon na ibinigay sa unang flag-raising ceremony ng lungsod sa Manila City Hall noong Lunes, Enero 5.

Ayon kay Domagoso, pumapasok ang pamahalaang lungsod sa Bagong Taon na may panibagong pag-asa matapos mapagtagumpayan ang serye ng mga hamong pang-ekonomiya noong 2025.

“Ngayon, nagpapasalamat pa rin ako sa Diyos. Salamat sa Diyos na naitawid natin ang 2025, at umaasa ako na ang 2026 ay magdadala ng kaunlaran sa mamamayan ng Maynila at sa pamahalaang lungsod,” ani Domagoso.

“Pipilitin nating maging masinop at maging epektibo sa paggasta,” dagdag pa niya, kasabay ng pagkilala na sinubok ng nakaraang taon ang lokal na pamahalaan at ang mga kawani nito dahil sa mga hamong pinansyal na hinarap ng lungsod.

Tiniyak ng alkalde sa mga empleyado ng lungsod na patuloy na pagtutuunan ng pansin ng administrasyon ang disiplinado at responsableng pamamahala ng pondo upang mapatatag ang pananalapi ng lungsod.

Binigyang-diin din ni Domagoso na mahalaga ang pananampalataya, pagkakaisa, at kasipagan habang hinaharap ng lungsod ang mga hamon at oportunidad sa darating na taon.

“Kailangan nating patuloy na maniwala, gawin ang ating makakaya, at ang Diyos na ang bahala sa iba,” aniya.

Pinaalalahanan din ng alkalde ang mga kawani ng pamahalaang lungsod na umiiral ang serbisyong pampubliko dahil sa tiwala at sakripisyo ng mga nagbabayad ng buwis, at hinikayat silang maglingkod nang may kababaang-loob, integridad, at malasakit.

Nanawagan din si Domagoso sa mga empleyado ng lungsod na manatiling malusog at magkaisa, habang inanyayahan silang makiisa sa panalangin para sa isang ligtas, maunlad, at mapayapang Maynila sa 2026.

“Kung wala sila, wala tayo. Ang ating pag-iral ay dahil sa ating mga mamamayan,” aniya. “Ako ay umaasa at nananalangin para sa isang ligtas na lungsod, maunlad na lungsod, at mapayapang komunidad.”
(Gene Adsuara)