DRUG PUSHER ARESTADO SA BUY-BUST OPERATION NG PDEA, ₱1.36-M HALAGA NG ILEGAL NA DROGA NAKUMPISKA

MATAGUMPAY ang isinagawang buy-bust operation ng Philippine Drug Enforcement Agency Regional Office 5 (PDEA RO5) sa pamamagitan ng Regional Special Enforcement Team (RSET) nito, sa tulong ng iba’t ibang ahensya ng pagpapatupad ng batas at mga katuwang na ahensya, nagresulta sa pagkakaaresto ng isang drug personality at pagkakakumpiska ng mga pinaghihinalaang ilegal na droga noong Enero 3, 2025, sa Barangay Quitago, Guinobatan, Albay.

Isinagawa ang operasyon dakong 9:01 AM sa aktibong suporta ng PDEA Albay Provincial Office, PDEA Regional Legal Unit (ROV), Guinobatan Municipal Police Station, at ng Regional Police Drug Enforcement Unit 5 (RPDEU 5).

Nakumpiska sa operasyon ang mga pinaghihinalaang ilegal na droga na tinatayang may kabuuang bigat na humigit-kumulang 200 gramo, na nakapaloob sa dalawang nakatali at nakabuhol na transparent na plastik na sachet na may puting mala-kristal na sangkap. Ang mga nakumpiskang ilegal na droga ay tinatayang aabot sa halagang ₱1.36-M.

Narekober din ang isang tunay na ₱1,000 na perang papel na nakarekord na serial number kasama ang ilang replika ng ₱1,000 na perang papel na nakabalot sa cling plastic, isang Android mobile phone, isang pink na paper bag, isang itim na plastik na lalagyan, at isang puting plastik na lalagyan.

Ang naarestong suspek na kilala bilang isang high-value target ay isang 27-taong-gulang, walang trabaho at residente ng Taguig City.

Ang suspek ay sasampahan ng kasong paglabag sa Section 5 (Sale of Dangerous Drugs), Article II ng Republic Act No. 9165, o mas kilala bilang Comprehensive Dangerous Drugs Act of 2002. (PAUL JOHN REYES)