Kaligtasan ng fans vs COVID-19, una sa PBA

PINAKAUNA sa lahat para sa Philippine Basketball Association (PBA) ang kaligtasan ng mga manonood kaya tiniyak ng propesyonal na liga na nakalatag ang hakbang pangkaligtasan kapag nagbukas ang 45th season sa Linggo, Marso 8, sa likod ng coronavirus outbreak.

Inatasan ng PBA ang venues na ng bawat games na magkaloob ng medical supplies kagaya ng thermometer scan, hand sanitizer o alcohol para sa publikong miron.

Sa Araneta Coliseum ang pagbubukas ng Philippine Cup tampok ang nag-iisang laro ng defending champion San Miguel Beer at Magnolia sa rematch ng 2019 Philippine Cup finals.

“Yes, usapan na namin sa mga venue na sila ang magpo-provide nun (medical supplies),” bulalas kahapon ni commissioner Willie Marcial. “Malaking bagay ‘yun. Tayong mga Pilipino, nag-iingat din.”

Sa taunang pagpaplano sa Milan ilang linggo pa lang ang nakararaan, si Marcial din ang nagmungkahi na mula sa dating Mar. 1 na iskedyul ng opening, pinagpaliban ito ng isang linggo dahil sa Chinese virus.

“Na-suggest ko ‘yun na i-delay muna para malaman natin kung ano ang mangyayari. Sa tingin ko nakabuti naman,” dugtong ng opisyal, na umaning dahil sa postponement ay posibleng humaba ang season.

“Baka umabot kami hanggang February. Malaking bagay ‘yung isang linggo,” wakas komisyoner.
Pero walang kaso ito sa PBA, basta sa kaligtasan ng lahat. (REC)