Paggunita sa kaarawan ni Bonifacio, pinangunahan nina Yorme Isko at VM Chi Atienza sa Maynila

PINANGUNAHAN ni Manila Mayor Isko Moreno Domagoso at Vice Mayor Chi Atienza ang paggunita sa ika-162th Kaarawan ni Gat Andres Bonifacio sa Tutuban sa Tondo, Maynila.
Sa kanyang talumpati, hinikayat ng alkalde ang mga Pilipino na panatilihin ang legasiya ni Bonifacio sa pagmamahal sa bayan.
Hinikayat din ni Mayor Isko ang mga Pilipino na panatilihin ang diwa ng pagmamahal sa bayan na ipinakita ng Supremo.
Aniya, ang mga kalayaang tinatamasa ngayon ay pinaghirapan ni Bonifacio at ng mga nagbuwis ng buhay para sa susunod na henerasyon.
“Kaya ‘wag sana nating limutin, hindi lang sa loob ng silid-aralan, hindi lamang sa mga asignatura ng ating eskwela, kundi bilang mamamayan din na ‘We the people today’—tayo na mga tao ngayon—ay utang natin sa kanila ang ating tinatamasang kalayaan sa ngayon,” ani Yorme
Binigyang-diin din ni Domagoso kung paano ginamit ni Bonifacio ang talino, husay, at ang entablado upang magmulat ng damdaming makabayan.
Aniya, ang kakayahan ng Supremo na magbigay-inspirasyon sa ordinaryong Pilipino ay isang paalala na ang pagbuo ng bayan ay posible kahit walang pribilehiyo o estado.
“Ang mga bayani, rebulto na ’yan, maaaring makita ninyo ’yung bakal, semento, pintura, maaaring walang buhay; ngunit habang sila ay dinadaanan natin, dapat nating isabuhay lagi ang mga paalala ng mga rebultong ’yan: na ang pagmamahal sa bayan, minsan sukdulang kahit buhay mo ialay mo,” aniya.
Dagdag pa niya, ang mga hamong kinaharap ni Bonifacio—pang-aabuso, kawalan ng katarungan, at paghahangad sa kalayaan—ay naroroon pa rin sa kasalukuyan.
Kaya’t hinikayat niya ang mga Pilipino na manawagan ng pananagutan sa mga tiwali, subalit sa paraang may paggalang sa batas at sa mga institusyon na nagtataguyod sa karapatan ng mamamayan.
“Huwag kayong mawawalan ng pag-asa, malungkot ang ating sitwasyon bilang bansa… Patuloy tayo,” sabi ng alkalde .
Sa pagtatapos, pinaalalahanan niya ang mga pamilya, lalo na sa darating na Pasko, na ang pagmamahal, pagkakaisa, at pagtutulungan ang tunay na diwa ng kapaskuhan na magpapatibay sa bayan.
“Ang diwa ng Pasko’y dalawa: Pagbibigayan at Pagmamahalan… Kailangan ang maging diwa talaga ng Pasko sa bawat pamilyang Manilenyo at Pilipino ay pagmamahalan,” aniya.
Giit ng alkalde, mag-iwan ng bakas sa isang landas na matagumpay na naaayon para sa mga susunod na henerasyon ay may maayos nang tutunguhin na susundan ng ating saling lagi .
Samantala, umapela naman si Manila Vice Mayor Chi Atienza sa mga lider na maging tapat para manglingkod sa bayan tulad ni Bonifacio.
Binigyang-diin ni Atienza na gamitin ang puwesto para manglingkod bayani para sa mga Manileño.
Dumalo sa pag-alay ng bulaklak sa bantayog ni Gat Andres ang iba pang opisyal ng pamahalaang lungsod ng Maynila at saling lahi ng nasabing bayani. (Gene Adsuara)