Presensya ng pulisya sa mataong lugar sa panahon ng Pasko

INATASAN ni Manila Mayor Francisco “Isko” Moreno Domagoso ang Manila Police District (MPD) na tiyakin ang presensiya ng pulisya sa mga komersyal at pampublikong lugar ng lungsod bilang paghahanda sa nalalapit na panahon ng Kapaskuhan, dahil inaasahan ang pagtaas ng bilang ng mga insidente ng krimen sa huling bahagi ng taon.

Sa kanyang talumpati sa Manila Peace and Order Council 4th Quarter Meeting noong Huwebes, Oktubre 23, iniutos ni Domagoso sa MPD na mahigpit na sundin ang direktiba ni Philippine National Police (PNP) Acting Chief Gen. Jose Melencio Nartatez Jr. na nag-aatas ng mas pinaigting na presensiya ng pulisya sa mga pampublikong lugar.

Ayon sa Alkalde, pinaiigting ng pamahalaang lungsod ang kampanya para mapanatili ang kapayapaan at kaayusan sa pakikipagtulungan ng MPD, mga barangay, at iba pang ahensiya ng pagpapatupad ng batas.

Ayon kay Domagoso, Domagoso, ang pulis ay dapat nasa kalsada, nakikita, at nararamdaman ng tao, base sa kautusan ni Gen Nartatez.

Inatasan ni Domagoso ang MPD na magtalaga ng karagdagang mga tauhan at magsagawa ng 24-oras na pagpapatrolya sa mga mataong lugar tulad ng Binondo, Recto, Quiapo, Ermita, Malate, at University Belt.

Ang direktiba ng Alkalde ay bahagi ng patuloy na pagsisikap ng kanyang administrasyon na palakasin ang kaligtasan ng publiko, na una niyang binigyang-diin bilang isa sa mga pangunahing haligi ng kanyang “street-smart government” approach sa ilalim ng Make Manila Great Again na programa sa pagpapaunlad.

Sa loob ng unang 100 araw ng kanyang panunungkulan, naitala ng lungsod ang 9.2% pagtaas sa crime solution efficiency rate ng MPD, na iniuugnay ng Alkalde sa pinaigting na kampanya para sa kapayapaan at kaayusan.

“Ang gusto natin ay ligtas, mapayapa, at maayos ang Pasko sa Maynila. Titiyakin natin ’yan para sa mga Batang Maynila at sa mga bumibisita sa ating lungsod,” ani Domagoso. (Gene Adsuara)