Birthday wish ni PBBM: Matagumpay na inisyatiba ng gobyerno, natapos na mga proyekto

UMAASA si Pangulong Ferdinand Marcos Jr., na patuloy na magtatagumpay ang mga programa ng gobyerno at matatapos sa itinakdang oras ang mga mahahalagang proyekto sa iba’t ibang panig ng bansa.

Ito ang birthday wish ni Pangulong Marcos na magdiriwang ng kanyang ika- 68 taon sa darating na Sept. 13.

“Simple lang naman ang aking hangarin lalo na dito para sa administration na ito. Matapos namin lahat ng aming ginagawa,” ang pahayag ng Pangulo sa fourth episode ng kanyang podcast nang tanungin kung ano ang kanyang birthday wish.

“Or syempre marami diyan hindi talaga matatapos sa anim taon kaya sana masimulan lang para kahit papaano sa susunod na administration matutuloy dahil sayang naman. Maganda naman ang nagiging resulta. Maganda ang takbo ng ekonomiya,” dagdag na pahayag ni Pangulong Marcos.

Ipinagmalaki naman ng Pangulo ang positibong kalagayan ng ekonomiya ng bansa, at maging ang lumalagong ‘international respect’ para sa Pilipinas at mga mamamayang Filipino.

Inilarawan naman niya ang global recognition sa exceptional skills ng mga pinoy bilang “heartwarming.”

“Maganda ang takbo ng ekonomiya. Mataas ang tingin sa atin ng ating mga kaibigan sa buong mundo. Mataas ang tingin sa Pilipinas at lalo pang mas mataas ang tingin sa Pilipino. Alam mo lahat kahit saan ako pumunta, unang unang sasabihin ang gagaling ng mga Pilipino doon sa amin,” anito.