Malakanyang kay Baste Duterte ukol sa imbestigasyon ng flood control project: ‘Manood na lamang po siya.’

“MANOOD na lamang po siya.”

Ito ang naging tugon ni Presidential Communications Office Undersecretary at Palace Press Officer Claire Castro sa press briefing sa Malakanyang nang hingan ng komento hinggil sa sinabi ni Davao City Mayor Sebastian “Baste” Duterte sa panayam dito sa The Hague, Netherlands.

Sa halip aniya na sabihin ni Baste Duterte na ang imbestigasyon sa di umano’y maanomalyang flood-control projects ay isang “PR (public relations) stunt”, makabubuting ‘manood na lamang po siya.’

Sinabi kasi ni Baste Duterte na ang nagpapatuloy na imbestigasyon sa flood-mitigation projects ay isa lamang political theatrics, sabay sabing dapat na panagutin si Pangulong Ferdinand Marcos Jr. dahil siya ang highest-ranking official ng bansa.

“Because he [Marcos] is turning that into a press release now, it’s his PR stunt now,” ang sinabi ni Baste Duterte sa naging panayam sa kanya ni dating presidential spokesperson Harry Roque.

“If there is someone to blame, that would be him,” aniya pa rin.

Sinabi ni Baste Duterte na kung seryoso si Pangulong Marcos sa usaping ito, dapat ay magsampa ito ng kaso “file a case […] If he’s really serious… then why not file a case? If you really want to show the people, okay, you want to redeem yourself, then go to jail.”

Samantala, binigyang diin ni Castro na pananagutin ni Pangulong Marcos ang lahat ng opisyal at politiko na mapatutunayan na sangkot sa maanomalyang flood-prevention projects, kung saan iniwang lubog sa tubig-baha sa panahon ng tag-ulan ang ilang bahagi ng bansa. ( Daris Jose)