Biglaang pagkakasibak sa hepe ng PNP, nagpapakita sa lumalaking bitak sa administrasyong Marcos

MALAKI ang paniniwala nina ACT Teachers Rep. Antonio Tinio at Kabataan Rep. Renee Louise Co na ang biglaang pagtanggal kay PNP Chief Nicolas Torre III ng matapos lamang ang 85 araw na maluklok ito sa nasabing posisyon ay ebidensiya nang tumitinding internal conflicts at systemic breakdown sa loob ng Marcos administration.

“Ang patuloy na rigodon at awayan sa loob ng PNP ay nagpapatunay sa lumalalim na hidwaan sa administrasyong Marcos. Magkakaibang mga grupo ang nag-aagawan ng kapangyarihan sa gitna ng malalang korapsyon sa gobyerno, kapos na serbisyong panlipunan, at lumalalang kahirapan ng mamamayan,” ani House Deputy Minority Leader Tinio.

Ang komprontasyon ni Torre kay Napolcom at Interior Secretary Remulla kaugnay sa unauthorized personnel changes ay nagpapakita sa seryosong dibisyon sa loob ng law enforcement machinery ng pamahalaan.

“This recent development mirrors the typical behavior of reactionary and authoritarian governments where rival elite factions wage internal battles while ordinary citizens endure worsening public services, escalating costs of living, and persistent human rights abuses. Hindi masosolusyunan ng simpleng pagpapalit ng mga opisyal ang malalim na problema ng PNP bilang kasangkapan ng pang-aapi laban sa mamamayan,” pahayag naman ni Assistant Deputy Leader Co.

Hinikayat naman ni Tinio ang publiko na sa halip na pagtunan ng pansin ang internal power struggles ay tutukan na lamang ang usapin ng hustisya para sa human rights victims, panagutin ang mga opisyal sa isyu ng korupsyon sa flood control projects, confidential at intelligence, at iba pang pork barrel funds, at kabiguan ng admnistrasyon na sigurhin na sapat ang sahod at abot kayang cost of living ng sambaayan.

(Vina de Guzman)