Lalaki na most wanted sa robbery sa Navotas, swak sa rehas

SHOOT sa selda ang isang lalaking most wanted sa robbery matapos malambat sa Simultaneous Anti-Criminality Law Enforcement Operation (SACLEO) ng pulisya sa Navotas City.

Sa kanyang ulat kay Northern Police District (NPD) District Director P/BGen. Jerry Protacio, sinabi ni Navotas Police Chief P/Col. Renante Pinuela, ang akusado ay nakatala bilang No. 8 sa Top Ten Most Wanted Person sa Navotas CPS.

Isang impormasyon ang natanggap ng mga operatiba ng Warrant and Subpoena Section (WSS) hinggil sa kinaroroonan ng akusado kaya ikinasa nila ang joint opertaion, katuwang ang Patrol Base 1.

Dakong alas-11:25 ng gabi nang tuluyang masukol ng mga tauhan ni Col. Pinuela ang akusado sa Brgy. NBBN kung saan isinilbi sa kanya ang arrest warrant na inisyu ng Navotas City Regional Trial Court (RTC) Branch 286, para sa kasong Robbery with Force Upon Things.

Pansamantalang nakapiit ang akusado sa custodial facility unit ng Navotas CPS habang hinihintay ang pagpapalabas ng commitment order mula sa korte para sa paglilipat sa kanya sa City Jail. (Richard Mesa)