Sampung panukalang batas na sumasalamin sa adbokasiya ng partido para sa Serbisyong may Malasakit, inihain

MATAPOS ang pagbubukas ng ika-20 Kongreso, agad na inihain ni Malasakit at Bayanihan Party List Representative Girlie Enriquez Veloso ang Sampung panukalang batas na sumasalamin sa adbokasiya ng partido para sa Serbisyong may Malasakit, na nakatuon sa makatao at makatarungang batas para sa lahat.

Ang mga panukalang batas ay ang mga sumusunod:

1. Unified Health Record System Act – Hindi na kailangang ulit-ulitin ang medikal mong kasaysayan sa bawat ospital.

Ligtas at madaling ma-access ang iyong health record saan ka man hospital magpagamot.

2. Health Social Workers Welfare and Integration Act – Magkakaroon ng legal na katayuan, seguridad sa trabaho, at proteksyon ang mga health social workers sa pampublikong ospital at sa mga programa sa pampublikong kalusugan.

May malinaw na pamantayan, tuloy-tuloy na pagsasanay, at makatarungang sahod para mas makakatutok sila sa pagtulong sa pinaka-nangangailangan.

3. Health Diplomacy and Filipino Access to Global Medical Advancements Act – Aktibong makikipag-ugnayan ang gobyerno sa ibang bansa para makakuha agad ang mga Pilipino ng lifesaving na gamot, therapy, at teknolohiya.

4. Child Support Enforcement Act – Obligado ang non-custodial parent na magbigay ng pinansyal na suporta upang walang batang mapagkakaitan ng pangangailangan. Mabibigyan din ng proteksyon ang mga Solo Parent sa pagturing ng sustento at suporta sa anak bilang patakarang pambansa at hindi lang usapin ng pribadong paglilitis.

5. Gobyernong may PUSO Act (Pabansang Ugnayan para sa Serbisyong Organisado) – Isang Aplikasyon, Isang Bayad, Isang Ahensiya. Digital na Gobyernong may Pambansang Ugnayan para sa Serbisyong Organisado (PUSO). Walang mamamayan ang dapat gumanap bilang tagapamagitan o taga-abot ng mga dokumento sa pagitan ng mga ahensya ng gobyerno, kung maaari naman itong beripikahin o iproseso sa loob ng pamahalaan mismo. Hindi na kailangang mag-absent, pumila, o ma-stress.

6. Medical Assistance for Filipinos Act – Hindi na kailangang mangutang o mamatay sa paghihintay. Gagawing karapatan ng mga Pilipino ang tulong medikal sa panahon ng matindi at agarang pangangailangan. May garantisadong medical assistance na ilalaan sa mga pambulikong ospital mula sa gobyerno sa ilalim ng DOH. lisang Sistema, lisang pamantayan, at kwalipikado ang mga indigent, walang kakayahang pinansyal, at mga humaharap sa matitinding gastusing pangkalusugan.

7. Magna Carta for Barangay Health Workers Act – Matagal nang sandigan ng komunidad ang mga BHW pero kulang sa suporta. Ngayon, magkakaroon na sila ng karapatan, benepisyo, at proteksyon. Magkakaroon ng malinaw na sistema ng accreditation, training, at eligibility sa civil service.

8. Fire Victims Recovery Act – May malinaw na mandato kung sino ang dapat kumilos, kailan, at gaano kabilis dapat maibigay ang suporta. May agarang tulong pinansyal, pansamantalang tirahan, at long-term relocation para sa mga nasunugan. Saklaw ang Lahat ng Apektadong Pamilya kasama ang may-ari, nangungupahan, boarders, at informal settlers sa tulong ng gobyerno. Obligado ang kumpletong listahan ng lahat ng naapektuhan.

9. Continuing Professional Development Reform Act – Wala nang sapilitang CPD units o mamahaling seminars para lang makapag-renew ng lisensya. Ang karapatang mag-practice ay batay sa natapos mong edukasyon at naipasa mong board. Pinalawak ang kahulugan ng professional development na kumikilala sa atwal na karansan sa trabaho, research, pagtuturo, protekto ginawa o foreign experience bilang patunay ng iyong competence.

10. Health Resilience and Continuity of Care Act – Mas Matibay na Ospital sa Panahon ng Krisis. Magkakaroon ng flexible at integrated recovery support facilities sa mga pampublikong ospital para sa emergency, transition, o halfway care. Magkakaroon ng seamless na transition mula admission hanggang sa pag-recover ng pasyente, gamit ang modern referral system at continuity of care protocols para sa long-term recovery ng pasyente.

Batay sa prinsipyo na “Ang mga kapos sa buhay ay dapat higit na pinangangalagaan ng batas,” layunin ng mga panukalang batas ng Malasakit at Bayanihan na palakasin ang serbisyong pampubliko, igalang ang dangal ng bawat Pilipino, at palawakin ang access sa kalusugan at social support lalo na sa mga higit na nangangallangan.

Mula sa mas mabilis na proseso ng medical assistance at child support, hanggang sa pagbibigay-lakas sa mga barangay health workers at modernisasyon ng sistema ng pamahalaan, ang legislative package na tinaguriang mga panukalang batas na may malasakit ay tumutugon sa panawagan para sa isang makatao, maagap, at inklusibong pamahalaan. Sa hakbang na ito, pinagtitibay ni Cong. Girlie Enriquez Veloso ang kanyang paninindigan para sa mga repormang inuuna ang kapakanan ng mamamayan.

( Vina de Guzman)