P68K droga, baril, nasamsam sa Malabon drug bust

NASAMSAM sa isang hinihinalang tulak ng illegal na droga ang nasa P68K halaga ng shabu at isang baril nang kumagat sa ikinasang buy bust operation ng pulisya sa Malabon City, Martes ng gabi.

          Sa kanyang report kay Northern Police District (NPD) District Director P/BGen. Jerry Protacio, kinilala ni Malabon police chief P/Col. Allan Umipig ang naarestong suspek sa alyas na “Miyo”, 47, electrician, ng Brgy. Santulan.

Batay sa ulat, ikinasa ng mga tauhan ni Col. Umipig ang buy bust operation sa koordiansyon sa PDEA matapos ang natanggap na impormasyon hinggil sa umano’y pagbebenta ng suspek ng shabu.

Isa sa mga operatiba ng Station Drug Enforcement Unit (SDEU) na nagpanggap na buyer ang nagawang makipagtransaksyon sa suspek.

Nang tanggapin umano ng suspek ang marked money mula sa pulis na nagpanggap na poseur-buyer kapalit ng ibinenta niyang isang plastic sachet ng shabu, agad lumapit ang back-up na operatiba saka dinamba si alyas Miyo dakong alas-10:15 ng gabi sa Tila E. Martin St., Brgy.Santulan.

          Nakumpiska sa suspek ang nasa 10 grams ng hinihinalang shabu na may katumbas na halagang P68,000, buy bust money at isang kalibre .38 revolver na kargado ng tatlong bala.

          Ayon kay PMSg Kenneth Geronimo, mga kasong paglabag sa Sections 5 at 11 under Article II ng R.A. 9165 (Comprehensive Dangerous Drug Act of 2002) at RA 10591 (Comprehensive Law on Firearms and Ammunition) ang isasampa nila laban sa suspek sa pamamagitan ng inquest proceeding sa Malabon City Prosecutor’s Office. (Richard Mesa)