Utos ni PBBM, tugunan ang isyu ng bullying, mental health sa mga estudyante

HAYAGANG ipinag-utos ni Pangulong Ferdinand Marcos Jr. ang pagkuha ng mas maraming school counselors sa mga pampublikong paaralan sa gitna ng tumataas na kaso ng bullying at suliraning may kaugnayan sa mental health ng mga estudyante.

Sinabi ni Pangulong Marcos sa kanyang pang-apat na State of the Nation Address (SONA), araw ng Lunes, Hulyo 28, binigyang-diin nito ang tungkol sa emosyonal na pasanin na patuloy na hinaharap ng maraming estudyante.

Kailangan aniya na dapat itong tugunan ng gobyerno kasabay ng traditional academic interventions.

Napaulat na sinabi ng Department of Education (DepEd) ang kakapusan ng mga counselor sa paaralan sa pagsuporta ng kapakanan ng mga mag-aaral.

“Maraming mag-aaral ang nakakaranas ng bullying o kaya’y depresyon. Binabantayan natin ang mental health ng ating kabataan,” ayon kay Pangulong Marcos.

At para tugunan aniya ito, winika ng Pangulo na dapat na dadagdagan ng DepEd ang bilang ng mga school counselor na magsisilbing support system at first responder para sa mga estudyanteng in distress.

Sa kabilang dako, binanggit din ni Pangulong Marcos ang paglulunsad ng YAKAP Caravan, isang inisyatibo sa buong bansa na magbibigay ng mga libreng medical checkup, cancer screenings, at mahahalagang gamot para sa mga mag-aaral at guro.

Sa kabila ng pangunahing nakatuon sa pisikal na kalusugan, inaasahan naman na magbubukas ng mas maraming paraan ang YAKAP program para sa maagang pagtukoy ng psychological stress, anxiety, at depresyon sa mga estudyante, lalo na sa mga komunidad na kulang sa serbisyo.

“Naglaan tayo ng isang bilyon para makapagtayo ng mahigit tatlong daang Barangay Child Development Centers at Bulilit Centers sa buong bansa. Lalo na sa mga higit na nangangailangang pook. At pauna lamang ‘yan. Unti-unti nating tutugunan ang matinding kakulangan sa daycare centers na nabinbin mula pa noong 1990,” ayon sa Chief Executive.

Umaasa naman ang Pangulo na magtutulungan ang mga ahensiya ng edukasyon at kalusugan para maisama ang mental wellness assessments sa programang pangkalusugan na may kaugnayan sa paaralan.

Sinasabi na matagal nang isinusulong ng mga tagapagtaguyod ang mas matibay na suporta sa kalusugang pangkaisipan sa mga paaralan—lalo na matapos ang COVID-19 pandemic na nagpalala ng kalungkutan, pressure sa pag-aaral, at emotional stress ng mga estudyante.

Ito’y sa kabila ng pagpasa ng Mental Health Act noong 2018, usad-pagong naman ang pagpapatupad ng programa sa basic education, dahil sa kakulangan ng mga lisensyadong guidance counselor.

Sa ulat, base sa pinakahuling datos ng DepEd, libo-libong paaralan pa rin ang nagsasalo sa iisang guidance counselor kung mayroon man sila.

Ang naging panawagan ni Pangulong Marcos ay hudyat na kailangan ang agad na pagtugon sa harap ng matinding pangamba ng publiko sa mga insidente ng student suicide, karahasan sa loob ng paaralan, at online harassment.

“Ang pinakamahalaga sa sistema ng edukasyon ay ang ating mga mahal na guro,” ang sinabi ng Pangulo.

Binigyang-diin nito ang pangangailangan na suportahan ang mga mag-aaral at guro. (Daris Jose)