Ipinaalam kung gaano niya ito kamahal:  GLAIZA, nagluluksa sa pagpanaw ng kanyang ama

NAGULAT kami nang makita namin ang social media post ni Glaiza de Castro. Pumanaw na ang kanyang ama noong Sabado, July 26.

Marami ang nakakakilala sa tatay ni Glaiza dahil bata pa lang ang actress, matiyaga na siyang sinasamahan ng tatay niya sa mga taping, shooting o showbiz ganap niya. Ang alam din namin, ang ama ang isa sa pinagkuhanan ni Glaiza ng husay sa pag-awit.

Sa post ni Glaiza, sinabi niya kung gaano niya ito kamahal at alam niyang alam ng tatay niya ito.

Aniya, “Ganito kita aalalahanin, yung mga tawa’t ngiti, boses mo lalo na pag kumakanta ka… fan na fan mo talaga ako. At salamat sa pagsuporta mo sa mga pangarap ko.

“Masaya akong nakasama ka na makamtam yun. Salamat sa pagmamahal mo sa amin… sa lahat-lahat. Mahal na mahal kita ‘tay alam mo yan… pahinga ka ng maigi.”

Ang aming pakikiramay kay Glaiza, sa nanay niya na inseparable sa kanyang tatay at sa buong Galura family.

***

NAIINTINDIHAN na namin ngayon kung bakit sa halip na ma-pressure na sa July 30 ay ipalalabas na ang horror movie na P77 at pinagbibidahan ni Barbie Forteza, nasabi niyang “fulfilment” ang nararamdaman niya.

Nagkaroon ng advance screening ang P77 bago ang premiere night nito ngayong gabi sa SM Megamall. Dumating si Barbie at ang plano sana niya, hindi niya papanoorin muna ng buo ang movie, pero hindi na rin niya nabitawan at tinapos na rin ito.

Napakahusay ni Barbie sa P77! Magaling naman na talaga siyang actress, pero sa pelikulang ito, may pakiramdam kaming pwede siyang ma-shortlisted bilang Best Actress.

Maganda ang pelikula na sa genre ng horror, ilan lang ang masasabi naming matino o may katuturan. How your nightmare can really scare or change your life.

Actually, hindi siya yung typical na horror film. Malinaw ang premise ng pelikula na naitawid at napapanahon. Directed by Derrick Cabrido, written ng Enrico Santos at under GMA Pictures, GMA Public Affairs at Warner Bros.

Sa isang banda, birthday ni Barbie sa July 31. Ngayon pa lang daw, nakuha na niya ang birthday gift niya dahil sa movie. At masaya ito na marami na ang may pa-block screening on Wednesday. Kaya maghapon daw siyang mag-iikot sa lahat ng block screening ng P77.

(ROSE GARCIA)