Marami ng pagbabago dahil tumatanda na sila: LANI, nag-agree sa post ni REGINE na tapos na ang panahon sa music industry

HININGAN namin ng reaksyon si Lani Misalucha tungkol sa post ni Regine Velasquez sa kanyang Tiktok account noong November kung saan sinabi ni Asia’s Songbird na alam niyang hindi na niya panahon at tapos na ang kanyang panahon sa music industry.

“Look, every one of us, tumatanda tayo. Di ba,” umpisang sinabi ng Asia’s Nightingale.

“Especially sa aming mga babae, na iba yung katawan namin compared sa katawan ng lalaki.

“Maraming mga nag-iiba sa katawan namin, sa hormones, especially kapag nandito ka na sa ‘middle age’, you know.

“Marami ng pagbabago, sa katawan namin, sa boses, kasi muscle din naman ito e, di ba?

“So yung sinasabi ni kumareng Reg na hindi na ito yung prime namin totoo din naman iyon!

“Ako rin, ganun naman din talaga, di ba? Lahat iyan… marami ng sakit, di ba? May mga sakit na sa balakang, sa tuhod.

“Lalo na ako, especially na nagkaroon na ako ng disability, nakikita niyo naman lagi akong inalalayan ni Christian kasi wala na nga akong balance.”

Si Christian Bautista ay tulad ni Lani na judge sa ‘The Clash 2025.’

Ang disability naman ni Lani ay ang pagkakaroon niya ng bacterial meningitis noong 2022 na naging dahilan upang magkadiperensiya ang kanyang pandinig.

“So mas lalo na sa akin because nga yung disability ko na partially deaf, it’s, it’s… mas mabigat para sa akin.

“So maaaring nasabi ni Reg iyon dahil nga iyon na yung mga nararamdaman niya. Hindi na kami bata e, hindi na kami bata.

Sa Tiktok ni Regine pa rin, sinabi nito na hindi na siya nakikipagkumpitensiya sa mga mas nakakabatang singers.

“And iyong sinasabi mo na makipagsabayan, hindi na rin naman namin kailangang makipagsabayan, you know,’ reaksyon ni Lani.

“Nadaanan na namin ang magagandang mga experiences sa buhay, at nabigyan kami ng magandang mga pagkakataon na nadadaanan naming lahat iyon.

“Nabigyan na kami ng magagandang, ano ang tawag mo dito? Na-meet namin ang maraming mga tao sa pamamagitan ng aming pagkanta.

“That’s enough, with that, that’s already enough for us and sa stage na ito, ako, ako ‘no, sa stage na ito sa totoo lang ine-enjoy ko na rin lang.

“Pero ako’y nagpasalamat sa Panginoong Diyos na kahit anong… no matter how I try to step away, wala e, dumarating pa rin ang mga oportunidad.

“Dumarating pa rin ang mga pagkakataon na gusto pa rin akong pakantahin.

“So iyon na lang ang malaki kong pasasalamat sa Panginoong Diyos dahil may ginagawa pa rin ako ngayon.

“Kasi gusto ko naman din talaga na… ayokong sabihing pahinga pero parang kumbaga talagang mag-slow down.

“Pero hindi, e.”

Samantala, nagbabalik ang The Clash na umere ang pilot episode nitong Hunyo 8 kung saan mga hurado sina Lani, Christian at Ai Ai delas Alas at hosts naman sina Julie Anne San Jose at Rayver Cruz.

Napapanood dito tuwing Linggo, 7:15 pm, ang mga baguhan o first time contestants ng The Clash na sina Adelle Yu, Carlos Florez, Divine Camposano, Jan Echavarria, Jayce San Rafael, Juary Sabith, Liafer Deloso, Leigh Atienza, Marian Pimenta, Mitzi Josh, Scarlet Yape at Venus Pelobello.

At ang twist, makalalaban nila ang mga Clashbackers; labingdalawang datihang contenders na nagmula sa mga nakaraang season ng naturang singing competition.

Ito ay sina Vilmark, Renz Robosa, Jennifer Maravilla, Arabelle dela Cruz, Nef Medina, Lyra, Bea, Liana Castillo, Zyrene Ciervo, Allain Maristela Gatdula, Tombi Romulo at Jong Madaliday.

(ROMMEL GONZALES)