Nag-iisa at walang makapapantay sa kasikatan ng Superstar: Pagpapakatotoo sa sarili, mahalagang natutunan ni JUDY ANN kay NORA 

ISA sa mga mahalagang bagay na natutunan ni Judy Ann Santos sa yumaong Superstar na si Nora Aunor ay ang pagpapakatotoo sa sarili.

Bukod dito ay ang kahalagahan ng pagiging mapagpakumbaba kahit na gaano katayog ang maabot ng isang artista sa industriya ng pelikula at telebisyon.

Lahad ni Juday, “Ang sinabi lang naman niya, mahirap ang industriyang ito, pero hangga’t mabuti at mababa ang loob mo, wala kang magiging mali.

“O kung may pagkakamali ka man, aminin mo. Mamahalin ka ng tao hanggang dulo.

“Yun ang pinaka-naaalala ko kay Ate Guy. Kung totoo ka, walang magiging problema. Problema na ng ibang tao na hindi totoo sa iyo.”

Marami ang naniniwala na si Judy Ann, na kilala noon bilang Young Superstar at ngayon ay binansagang Prime Superstar, ang nag-iisang maaaring maging katulad ni Nora pagdating sa pagiging isang mahusay at multi-awarded actress here and internationally.

Pero para kay Judy Ann, isa lamang ang Superstar, walang iba kundi si Nora Aunor.

“Alam mo, lagi ko ngang sinasabi, walang iba na puwede pang maging Superstar.

“Siya lang, si Ate Guy lang talaga,” pahayag ni Judy Ann sa huling araw ng burol para sa namayapang National Artist.

“Of course, nakakataba ng puso, lagi namang ganun,” reaksyon ni Juday tungkol sa paghahalintulad sa kanya kay Ate Guy.

“But laging sinasabi ko na hindi puwede.

“Wala namang makakatapat sa kasikatan at sa lawak ng narating niya. Di naman ako magiging ipokrita at magsisinungaling na di siya nakakakilig.

“Pero ni wala sa kalingkingan ng narating ni Ate Guy ang narating ko. Malayo… malayung-malayo…

“I’m just honored, nagpapasalamat ako sa thought na naging parte siya ng karera ko.”

Nakasama ni Juday sa dalawang pelikula si Ate Guy; sa ‘Sana Mahalin Mo Ako’ (1988) at ‘Babae’ (1997).

(ROMMEL L. GONZALES)