‘Aleng Pulis’ ipinuwesto sa NCRPO

INIHAYAG ni National Capital Region Police Office (NCRPO) Director PBGen. Anthony Aberin na ipupuwesto at pamumunuan na ng  mga ‘Aleng Pulis’ ang ilan sa mga  pangunahing posisyon  sa organisasyon.

Ayon kay Aberin, hindi na malilimita sa mga office work ang mga babaeng pulis at sa halip at isasabak na sa mga  key position sa NCRPO at  ipakikita ang kanilang  kakayahan pamunuan ang isang  division.

Nabatid na sinimulan na ni Aberin pagbabago matapos na ipuwesto ang isang babaeng opisyal sa Civil Disturbance Ma­nagement (CDM) kabilang ang elite SWAT teams.

Sinabi ni  Aberin na hindi rin matatawaran ang kakayahan ng mga babaeng pulis sa pagbibigay ng seguridad  sa publiko at maging sa buong bansa.

Hindi aniya usa­pin ang kasarian at sa halip ay kakayahan na ­ipatupad ang peace and order at serbisyuhan ang publiko sa oras ng pangangailangan.

Nasa 25,743 ang mga pulis sa NCRPO at ipinatutupad ang programang “Able, Active, and Allied” kung saan 19 porsiyento ang babae.