5 katao ang nasawi sa gitna ng masamang panahon mula sa ITCZ, shear line- NDRRMC

LIMANG katao ang nasawi, 20 ang sugatan at dalawa ang nawawala dahil sa masamang kalagayan ng panahon sanhi ng Intertropical Convergence Zone (ITCZ) at Shear Line.

Ayon sa National Disaster Risk Reduction and Management Council (NDRRMC) bulletin, ang mga nasawi na naitala ay mula sa Region II, IV-A, IV-B, V, VIII, at XI.

Sa kabuuan, may 436,164 indibiduwal o 139,000 pamilya ang apektado ng masamang panahon. Kabilang dito ang

549 pamilya, o 2,366 indibiduwal, kasalukuyang kinakanlong sa 29 evacuation centers.

Dahil din sa masamang panahon, nagkaroon ng pinsala ang imprastraktura. Naitala ang isang power interruption, hindi madaanan ang 39 na lansangan at anim na tulay sa mga apektadong lugar.

Tinatayang umabot naman sa P215.7 million ang halaga ng pinsala, na may 698 na bahay ang partially damaged at 394 naman ang completely destroyed.

Sa ngayon, mahigit sa P15.15 million na tulong na ang naipamahagi.

Samantala, idineklara naman ang state of calamity sa Baco, Oriental Mindoro, at maging sa Don Marcelino at Malita sa Davao Occidental. (Daris Jose)