NCAA referee binugbog

MAGSASAGAWA ng imbestigasyon ang NCAA Management Committee ukol sa pambubugbog sa isang referee ng ilang kala­lakihan matapos ang laro ng Mapua University at College of Saint Benilde sa NCAA Season 100 men’s basketball noong Sabado sa MOA Arena sa Pasay City.

Ayon kay NCAA ManCom chairman Hercules Callanta ng host school Lyceum, hihingi sila ng video recordings o CCTV mula sa MOA Arena management.

“There was an incident that took place after the CSB-Mapua game, when the referees went towards their place. They were accosted by several people we do not know yet how many and who,” ani Callanta.

Pinadapa ng Blazers ang Cardinals, 78-65, sa nasabing laro.

Bagama’t tanging mga players, coaches at referees lamang ang napaparusahan ng NCAA, maaari naman nilang i-ban ang nasabing mga fans sa lahat ng NCAA games.

Samantala, umiskor si guard Rafael Are ng 10 sa kanyang 30 points sa fourth period para sa 91-84 pagresbak ng San Sebastian sa Letran kahapon sa Filoil EcoOil Centre sa San Juan City.

Bumangon ang Stags mula sa isang 14-point deficit para regulahan ng panalo si coach Arvin Bonleon.

Minalas naman si Allen Ricardo sa kanyang debut para sa Knights.