5.1 milyong botante, dine-activate ng Comelec sa voter’s list; 240K, tuluyang inalis

UMAABOT na sa mahigit 5.1 milyong botante ang dine-activate ng Commission on Elections (Comelec) sa voter’s list habang mahigit 240,000 naman ang tuluyan nang inalis.

Ayon kay Comelec Chairperson George Erwin Garcia, kabuuang 5,105,191 rehistradong botante ang na-deactivate sa opisyal na listahan ng mga botante matapos ang isinagawang ERB hearing noong Abril 15, 2024.

Samantala, nasa 248,972 botante naman ang tuluyan nang natanggal o binura sa listahan.

“As of April 15, 2024 ERB Hearing

Deactivated = 5,105,191

Deleted = 248,972,” ani Garcia, sa isang Viber message.

Ipinaliwanag ni Garcia na karamihan sa mga tinanggal ay yaong nakumpirmang namatay na.

Ang iba naman ay natuklasamg may double o multiple registration.

“‘(‘Yung) natanggal [ay] dahil sa kamatayan [at] multiple at double registration,” ani Garcia.

Karamihan naman sa mga na-deactivate ay yaong mga hindi nakaboto sa dalawang magkasunod na eleksiyon.

Mayroon ding ina­lis base sa utos ng hukuman, pagkawala ng pagkamamamayang Pilipino, at pagkakaroon ng mga di-wastong dokumento.

Samantala, iniulat naman ni Garcia na nakatanggap ang poll body ng kabuuang 409,329 na aplikasyon para sa reactivation mula Pebrero 12 hanggang Hulyo 20.