Mag-lola todas sa sunog sa Caloocan, 9 pa sugatan

NASAWI ang mag-lola habang siyam pa ang sugatan, kabilang ang apat na kaanak ng mga nasawi at limang bumbero, sa naganap na sunog sa Caloocan City, Lunes ng tanghali.

Dead-on-arrival sa Caloocan City Medical Center ang 21-anyos na estudyanteng si Layla habang wala na ring buhay ang kanyang 84-anyos na lolang si Aling Purita nang matagpuan sa ibaba ng dalawang palapag na nasunog nilang tirahan sa 248 Marcela St. Brgy. 27 Maypajo.

Sa tinanggap na ulat ni Caloocan City Fire Marshal F/ Supt, Eugene Briones, kapuwa nasawi ang maglola bunga ng pagkakalanghap ng usok makaraang ma-trap sa loob ng bahay nang sumiklab ang apoy dakong alas-12:45 ng tanghali.

Bukod sa mag-lola, namatay din sa sunog ang 10 nilang mga alagang aso at pusa habang siyam ang nasugatan, kabilang si FO2 Nestor Siervo ng Caloocan City Bureau of Fire Protection (BFP), apat na fire volunteer, mga magulang ni Lyla na sina Epimaco at Lily, 54, at dalawa pa nilang kaanak.

Umabot sa ikalawang alarma ang sunog bago tuluyang naapula dakong alas-2:33 ng hapon na tumupok sa tinatayang P300,000 halaga ng ari-arian.

Ayon kay SFO3 Randel Angeles, wala namang iba pang katabing bahay na nadamay sa insidente habang inaalam pa ang pinagmulan ng sunog. (Richard Mesa)