Sa pagkakaalis ng video ng gender reveal: YASMIEN, nagulat sa rason na bullying and harassment

HINDI namin masisisi si Yasmien Kurdi kung magkahalong gulat at pagkainis ang naramdaman niya sa pagkakaalis sa Facebook at Instagram ng video ng kanilang gender reveal.

Ang rason umano? Bullying and harassment! Kaloka, di ba?

Kaya naman inilahad ni Yasmien sa kanyang Facebook page ang kanyang saloobin tungkol dito kalakip ang screenshot na ipinadala sa kanya ng diumano’y nagawa niyang paglabag sa patakaran ng community standards ng Facebook tungkol sa ipinost niya na gender reveal.

“Just last night we posted a video of our mini gender reveal and to our surprise this was taken down today on FB and IG due to bullying and harassment. We get reported a lot for wholesome contents,” umpisang lahad ni Yasmien.

Pagpapatuloy pa niya…

“Ang i-report n’yo po ay ang mga malalaswang contents, huwag po yung wholesome contents.

“Isipin po natin ang mga anak at magiging anak natin. Anong klaseng mundo ba natin sila gusto palakihin?”

November last year nag-announce sina Yasmien at mister niyang si Rey Soldevilla, Jr. na magkakaroon na sila ng bagong baby.

Susundan nito ang panganay nilang anak na si Ayesha Zara na 11 years old ngayon.

At base naman sa gender reveal video nila na tinanggal nga ng FB at IG, babae muli ang magiging anak nina Yasmien at Rey.

(ROMMEL L. GONZALES)