Napunit ang Achilles heel sa shoot ng movie: Sen. BONG, humingi ng dasal sa publiko dahil baka maoperahan

SA kanyang Facebook live ay humingi ng dasal si Senator Ramon ‘Bong’ Revilla, Jr. sa publiko dahil baka maoperahan.

Napunit kasi ang kanyang Achilles heel sa shoot ng entry niya para sa Metro Manila Film Festival, ang Alyas Pogi 4.

May eksena kasi na tumakbo siya ng ubod nang bilis kaya ayun, napunit ang kanyang Achilles heel.

Lahad ng Senador, “Yung aking Achilles tendon e medyo may partial tear kaya kailangan ng operation.

“First day ko ng Alyas Pogi 4, kasama si Ara Mina at Epy Quizon. You know, may mga pangyayari na hindi mo maiiwasan kaya mangyayari talaga yun.

“Basta importante, ipagdasal nyo po na hindi naman ganoon grabe.

“Pero na-MRI na po ako kanina at sinabi nga ng doktor na fifty percent ng aking Achilles heel, e, na-tear dahil sa pagtakbo. Dahil sa sobrang bilis ko raw tumakbo.

“Yun ang sinasabing na hindi na tayo bumabata, tumatanda na, but I am okay.

“Yun nga lang, yung healing time, medyo matagal-tagal. After the operation, medyo three to five months ang healing.”

Sasailalim sa mga tests si Senator Bong upang malaman kung kailangan siya operahan at kung kailan.

Inis siya siyempre dahil tiyak na magugulo ang kanyang schedule bilang artista at pulitiko dahil sa pagkakaospital niya.

Mabuti na lamang at nakumpleto ni Senator Bong ang taping niya para sa season 2 ng ‘Walang Matigas Na Pulis Sa Matinik Na Misis’ bago nangyari ang insidente.

(ROMMEL L. GONZALES)