Chinese National na may kasong trafficking, naharang

HINARANG  ng mga opisyal ng Bureau of Immigration (BI) sa Ninoy Aquino International Airport (NAIA) ang isang Chinese national na pinaghahanap ng mga awtoridad sa Beijing dahil sa trafficking at pagre-recruit ng mga babaeng Filipina para iligal na magtrabaho sa China.

Kinilala ni Immigration Commissioner Norman Tansingco ang pasahero na si Tong Jialong, 35-anyos, na nahuli sa NAIA terminal 3 noong Abril 12 nang siya ay sasakay ng Air Asia flight papuntang Shanghai.

Sinabi ni Tansingco na ang pagkakakilanlan ni Tong ay nagbunsod ng isang hit sa Interpol derogatory system ng BI na nagpapakita na siya ay napapailalim sa isang red notice dahil sa pagiging isang takas mula sa hustisya sa kanyang bansa.

“He was, however, allowed to board his flight after the BI informed the Chinese police about his impending arrival in Shanghai,” sabi ng  BI chief .

Ayon kay BI-Interpol acting chief Jaime Bustamante, agad na inaresto si Tong pagdating sa Shanghai airport kung saan hinihintay na siya ng mga awtoridad ng China bago pa man lumipad ang kanyang flight mula Maynila.

“He is already in the custody of the Chinese police and is now behind bars pending his trial for the crimes he allegedly committed,” saad ni Bustamante.

Inihayag ng BI-Interpol na ang warrant of arrest laban kay Tong ay inisyu ng Yongjia public security bureau noong Disyembre 2018 matapos ang kasong trafficking of persons at illegal border crossing laban sa kanya.

Inakusahan ng mga tagausig ng China na sa pagitan ng Abril hanggang Disyembre 2018, nakipagsabwatan si Tong sa iba pang mga suspek sa pagpapadali sa paglalakbay sa Vietnam ng humigit-kumulang 40 kababaihang Pilipino na kalaunan ay dinala sa China sa pamamagitan ng ilegal na pagtawid sa boarder.

Nang maglaon, ang mga kababaihan ay nagtrabaho bilang mga sex worker o mga iligal service  worker s bahay na pinagkakakitaan ng kanilang mga recruiter.

Si Tong, gayunpaman, ay nakaiwas sa pagkakaaresto nang umalis siya sa China at nanatili sa Pilipinas mula nang dumating siya rito noong Marso 2018. GENE ADSUARA