Miyembro ng criminal gang, tiklo sa entrapment ops sa Caloocan

LAGLAG sa selda ang isang miyembro ng ‘Dacallos Criminal’ gang na sangkot umano sa illegal na pagbebenta ng baril matapos matimbog ng pulisya sa entrapment operation sa Caloocan City.

Ayon kay Caloocan police chief P/Col. Ruben Lacuesta, nakatanggap ng impormasyon ang mga operatiba ng Station Intelligence Section (SIS) hinggil sa umano’y iligal na pagbebenta ng baril ng suspek na si alyas “Kwatog”, 23, ng Brgy. 176, Bagong Silang kaya isinailalim nila ito sa validation.

Nang positibo ang ulat, ikinasa ng SIS, kasama ang NDIT, RIUNCR IG at Northern NCR Maritime Police Station ang entrapment operation na nagresulta sa pagkakaaesto kay ‘Kwatog’, alas-2:30 ng madaling araw sa Tandang Sora St., Pag-asa, Brgy. 175, Camarin.

Ani Col. Lacuesta, nakuha sa suspek ang isang cal. 38 revolver na kargado ng dalawang bala at buy bust money na isang P500 bill, kasama ang dalawang pirasong P1,000 boodle money.

Mahaharap ang suspek sa kasong paglabag sa RA 10591 o Comprehensive Firearms and Ammunation Regulation Act. (Richard Mesa)