Mga doktor nabahala sa paglobo ng pertussis

LUBHANG nababahala ang Philippine College of Physicians (PCP) sa pagtaas ng mga kaso ng pertussis o whooping cough sa Pilipinas.

Sa unang 10 linggo nitong taon, nakapagtala ang Department of Health (DOH) ng mahigit sa 500 kaso ng nasabing sakit kung saan 40 ang nasawi at idineklara ang outbreaks sa Quezon City, Pasig City, Iloilo City at Cavite.

Paalala ng PCP, ang pertussis ay isang acute respiratory infection na dala ng bacteria Bordetella pertussis na karaniwang banta sa  mga sanggol at mga kabataan at siyang mas may matinding sintomas at posibleng ikamatay  kapag hindi naagapan.

Habang sa mga teena­gers at adults ay maaaring magkaroon ng mas mild na symptoms, subalit may banta pa rin lalo na sa mga may pre-existing health conditions sa mga hindi bakunadong elderly populations.

Suportado naman ng PCP ang DOH sa panawagan nito para sa kampanya para sa pagbabakuna para maprotektahan ang mga sanggol at mga kabataan.

Lumalabas aniya sa pag-aaral na ang pagbabakuna ng pertussis vaccine (Tdap) ay nakakapagpababa ng 92% and 97% ng pertusis mortality rates at sa fully vaccinated individuals at nakakabawas ng matinding sintomas.