Karagdagang financial assistance ibigay sa mga bingi, bulag, pipi at may down syndrome kada taon

NAIS ni Iloilo Rep. Janette Garin na mabigyan ng karagdagang financial assistance kada taon sa mga taong pipi, bingi, bulag at may mga down syndrome.

Ang panukala ay ginawa ng mambabatas kasunod na rin sa ipinatupad na Bagong Pilipinas Serbisyo Fair (BPSF) sa Iloilo.

“Nararapat lamang po na bigyan ng dagdag na tulong ang ating mga kababayan na may kapansanan upang makatulong sa kanila,” ani Garin.

Ang BPSF ay proyekto nina Pangulong Marcos at Speaker Martin Romualdez na naglalayong mailapit pa ang mga serbisyo publiko sa publiko. Isa itong pinakamalaking service caravan sa bansa na naglalayong maipaabot ang mga major government services sa mga mahihirap na pinoy sa bansa, kabilang ang mga programang Kadiwa ng Pangulo, Passport on Wheels, Driver’s License registration/assistance, at iba pang tulong.

Umaasa ang mambabatas na ang panukala niyag tulong ay maipatupad sa buong bansa.

“Malaking tulong po itong programang ito para mas mapadali ang pagkuha ng dokumento ng ating mga kababayan. Mas mabilis at madaling serbisyo ang handog ng administrasyon,” pagtatapos ni Garin.

(Ara Romero)