Nang mapanood ang movie nila ni Julia: ALDEN, ilang minutong ‘di nakapagsalita at naluha

AMINADO si David Licauco na noong bata pa, hindi naman daw niya naisip na magiging artista siya kaya hindi niya rin masabi na pinangarap niyang talaga ang maging action star.

Pero, mahilig na raw siyang manood ng mga action films.

“Siguro growing-up, pangarap kong maging Jackie Chan or Jet Li. Kasi, pinapanood ‘yon ng Dad ko. Pero, hindi ko naman siya naisip na parang magiging artista ko.

“Walang moment in my life na magiging dream ko na maging artista. But I remember one time, nanonood lang ako sa bahay, parang sabi ko, bakit kaya ganito ang buhay ng mga artista? Akala ko that time, nasa TV talaga sila. Buong buhay nila, nandoon sila.

“Kasi, hindi naman natin alam ‘yung sequence guide. Hindi naman literally na nasa TV lang,” natawang kuwento niya.

Mula sa phenomenal hit na ‘Maria Clara at Ibarra’, hindi rin naman daw nagulat si David na action/drama ang sumunod na ibinigay sa kanila ni Barbie Forteza na teleserye.

Ayon dito, “Hindi naman ako nagulat. Kasi, kung ano man ang ibigay nila sa akin, tinatanggap ko naman, e. Parang hindi naman siya nag-cross ng mind na, ‘ano kaya ang next project ko?’ Hindi naman gano’n”

Ang ‘Maging Sino Ka Man’ ay adaptation ng 1991 movie na pinagbibidahan nina Sharon Cuneta at Robin Padilla. Si David nga ang gumaganap sa karakter na dating ginampanan ni Robin na kilala sa pelikula bilang ‘Bad Boy of Philippine Cinema.’

Hindi naman daw na-pressure si David portraying the role of Robin. Although, alam niya raw na it’s a big shoe to fill-in para sa kanilang dalawa ni Barbie.

Ang ‘Maging Sino Ka Man’ ang papalit sa ‘Voltes V: Legacy’ sa GMA Primetime simula sa September 11.

***

IBA ang style ngayon ng bagong movie na pinagbibidahan nina Alden Richards at Julia Montes.

Ilang teaser drops kaya ang ilalabas nila bago sila maglabas ng full trailer?

Sa first teaser na inilabas, pwede naming sabihin na nakuha na nina Alden at Julia ang interes ng ilang netizens na mapanood ang kanilang movie na ‘5 Break-Ups and a Romance.’

Matagal-tagal na walang ganitong klaseng movie mula sa mainstream. At sa teaser pa lang na ‘yon, ibang Alden at Julia ang nakita namin. Naalala tuloy namin ang sinabi ni Alden na, ilang minuto siyang hindi nakapagsalita at naluha nang mapanood niya ang kabuuan ng pelikula dahil sa ganda raw nito.

So, sa October this year, mahuhusgahan na nga kung tulad ni Alden, gano’n din ang mararamdaman ng mga manonood at kung sa pamamagitan ng pelikula nila, maibabalik talaga ang sigla sa sinehan.

Sa isang banda, mukhang matured ang atake ng mga karakter nila rito at balita na nga na may controversial kissing scene ang dalawa.

(ROSE GARCIA)