2 E-bike driver huli sa aktong sumisinghot ng Marijuana sa Malabon

KULONG ang dalawang e-bike driver, kabilang ang 26-anyos na dalaga matapos mahuli sa akto ng mga pulis na sumisinghot ng marijuana sa Malabon City, kamakalawa ng gabi.

Kinilala ni P/Cpt Mark Xyrus Santos, Sub-Station 1 commander ng Malabon police ang naarestong mga suspek na sina Eugene Emocling, 23, E-bike driver ng No. 82 Sanapo HOA Sitio 6, Brgy. Catmon at Jamaica Bigalan, 26, E-bike driver ng No. 203 Hernandez St., Brgy. Catmon.

Sa kanyang report kay Malabon police chief P/Col. Amante Daro, sinabi ni Cpt Santos na habang nagsasagawa ng foot patrol ang kanyang mga tauhan sa Mabolo Road, Brgy. Potrero nang maaktuhan nila ang mga suspek na nagsasalitan umano sa pagsinghot ng marijuana dakong alas-11:45 ng gabi.

Hindi na nakapalag ang mga suspek nang lapitan at arestuhin sila nina PSSg Paul John Agliam at PCpl Francis John Miguel kung saan nakumpiska sa kanila ang isang glass tube/improvised pipe na naglalaman ng partly burned ng pinatuyong dahon ng hinihinalang marijuana fruiting tops at isang disposable lighter.

Ani PSSg Jerry Basungit, mahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)