Rep. Teves isa sa ‘utak’ sa Degamo slay – DOJ

IKINUKONSIDERA nang isa sa masterminds ang suspendidong si Negros Oriental Rep. Arnolfo Teves Jr., sa pagpatay kay Governor Roel Degamo at walong iba pa noong Marso 4, 2023.

Sa pulong-balitaan, sinabi Justice Secretary Jesus Crispin Remulla na hinahanap pa nila ang dalawa sa tatlong utak sa nasabing krimen.

“They can be contacted. I think meron namang nasa social media dyan. ‘Yung isa, meron nagtext sa akin. I told you last week, Cong. Teves texted me. They are being considered as masterminds,” anang kalihim.

Umuusad naman aniya ang imbestigasyon na kanilang ginagawa.

Sinabi rin ni Remulla na si dating Negros Oriental governor Pryde Henry Teves, ang nakababatang kapatid ng embattled congressman, ay maaaring masangkot din sa kaso ni Degamo kasunod ng pagsalakay sa kanyang sugar mill noong weekend.

Ilang matataas na armas, bala, at pampasabog ang narekober sa 50-ektaryang compound ni dating gobernador Teves sa Barangay Caranoche, bayan ng Santa Catalina mula Biyernes hanggang Linggo.

Sinabi ni Remulla na ang mga suspek na naaresto sa kaso ni Degamo ay nagsabing nakita nila ang paggawa ng mga pampasabog na natagpuan sa raid.

“Well this is used for terrorism, used for assassination, to create havoc, to kill people, nakita niyang ginagawa niyan, and ‘yung gumagawa noon that he said, ‘yung gumagawa non was part of the people arrested also, na kasama sa mga sumurrender,” pahayag pa niya.

Sinabi ni Remulla na sasailalim sa preliminary investigation ang nakababatang Teves at tiniyak niya na igagalang ang lahat ng karapatan ng lahat ng nasasangkot  sa kaso, kabilang ang kanilang karapatan sa due process. (Daris Jose)