3 biktima ng human trafficking naharang sa NAIA

HINARANG  ng mga opisyal ng Bureau of Immigration (BI) sa Ninoy Aquino International Airport (NAIA) ang tatlong babaeng pasaherong patungong Lebanon na nagtangkang umalis sa pagkukunwari bilang mga turista. Sinabi ni BI Commissioner Noman Tansingco, ang tatlong babae ay pinigil sa pag-alis sa kanilang mga flight matapos nilang aminin na sila ay papuntang Lebanon at na-recruit para magtrabaho doon bilang mga domestic helper.

“Ang mga sindikatong ito ng trafficking ay nagpapatuloy sa kanilang mga karumal-dumal na aktibidad ngunit hindi namin luluwagan ang aming pagbabantay sa pagpigil sa kanilang mga biktima na umalis at maligtas mula sa kasamaan ng human trafficking,” anito.

Ayon kay Elsie ­Lucero, BI-NAIA T3 Terminal head,  naharang ang tatlong pasahero noong Marso 10 at 12 sa nasabing paliparan. Ang tatlo ay inilipat sa Inter-Agency Council Against Trafficking para sa pagsasampa ng mga kaso laban sa kanilang mga recruiter. (Gene Adsuara)