PBBM, ipinag-utos ang pagtatayo ng 11 fish ports sa coastal provinces

IPINAG-UTOS ni Pangulong Ferdinand Marcos Jr.  ang pagtatayo ng fish ports sa  11 coastal provinces sa bansa para matugunan ang mga hamon na kinahaharap ng mga mangingisdang Filipino.

Binanggit ng Pangulo ang direktiba niyang ito sa isinagawang sectoral meeting, sa Palasyo ng Malakanyang, araw ng Martes, Marso 14.

Ipinag-utos ng Pangulo sa mga kinauukulang ahensiya ng pamahalaan na iprayoridad ang pagtatayo ng fish port sa 11 coastal provinces na naglalayong  “to capacitate and empower fisherfolks towards resiliency.”

Ipinag-utos din ng Chief Executive ang rehabilitasyon ng 20 identified municipal fish ports na tinawag bilang  traditional landing ports sa bansa.

Ang nasabing hakbang ayon sa Pangulo ay naglalayon na bawasan ang  post-harvest losses sa pamamagitan ng konstruksyon ng cold storage facilities sa fish ports sa buong bansa.

Ipinag-utos din ng Punong Ehekutibo sa mga ahensiya na magbigay ng  small-scale fisherfolks ice-making machines at matinding pagsasanay, at mamahagi ng  equipment upang maibaba ang post-harvest losses.

Ayon sa  Bureau of Fisheries and Aquatic Resources (BFAR), kabilang sa mga hamon na kinahaharap ng fisheries sector ay ang mababang huli ng mga isda, mataas na poverty incidence at post-harvest losses, kung saan, sa kasalukuyan ay 25 hanggang 40% ang nawawala o nalulugi kasama na ang  value chain.

Samantala, ipinresenta naman ng ahensiya sa Pangulo ang estratehiya para itaas ang  fish production sa pamamagitan ng  aquaculture ng  10%  annually sa loob ng anim na taon para makapag-ambag sa food security habang pinagagaan ang presyur mula sa “capture fisheries at enabling resources to recover.”  (Daris Jose)