Kazakhstan Asian Indoor hindi malulundagan ni EJ Obiena

PUWERSADO si Ernest John ‘EJ’ Obiena at ang iba pang miyembro ng national pole vault team na huwag na lang sumali sa gaganaping Asian Indoor Athletics Championships sa Pebrero 1- 12 sa Nur Sultan, Kazakhstan.

Siniwalat ni Philippine Athletics Track and Field Association president Agapito ‘Terry’ Capistrano Martes na hindi makakalahok ang reigning World Athletics No.3 men’s pole vaulter at ang tatlong iba sa PH team sa continental meet dahil sa problema sa logistics.

Inesplika ni PATAFA secretary general Edward Kho, na ang mga airline sa Astana ay gumagamit lang ng maliliit na sasakyang panghimpapawid at hindi pinapayagan ang pagkakarga ng mga mahahabang pole.

Pero hinirit ni Capistrano na pinag-iisipan pa ni Obiena ang huling minutong desisyon kung hahabol sa biyahe sa lupa para madala ang mga pole.

Sinimulan ni Obiena ang indoor season sa pagkopo ng pilak at gintong medalya sa Germany at France. (CARD)